DILI, 16 Dezembru 2025 (TATOLI)—Atleta Timoroan, Elísio Raimundo Gaio husi Modalidade Boxe hakat bá finál kategoria kilógrama 63.5 hafoin iha faze meiu finál koloka iha postu bye no tuir oráriu sei realiza iha loron-Sesta, 19 Dezembru tinan ne’e.
Atleta ho idade 28 iha posibilidade gaña medalla osan-mean bainhira iha faze finál klase kilógrama 63.5 sai vensedór ne’ebé sei realiza iha Chulalongkorn University Sports Center, Bangkok.
Notísia relevante: Atleta boxe na’in-rua eleminadu iha SEA Games
Tuir oráriu ne’ebé TATOLI asesu husi portál ofisiál SEA Games hatudu posibilidade Gaio sei kompete entre atleta rua seluk husi Repúblika Demokrátika Laos, Thongnin Xayaseng ka uma-na’in Tailándia, Khunatip Pidnuch, ne’ebé sei kontra malu iha meiu finál iha loron-Kuarta (17/12/2025).
Ho kompetisaun iha faze finál, bainhira Boxista Gaio sai kampiaun sei gaña medalla osan-mean, enkuantu bainhira derrota iha direitu rekolla medalla osan-mutin iha Modalidade Boxe kategoria klase mane kilógrama 63.5.
Entretantu, provizoriamente kontijente Timor-Leste foin rekolla medalla osan-metan tolu kompostu rua husi modalidade Taekwondo no ida husi Boxe.
Jornalista: Natalino Belo
Editór: Xisto Freitas da Piedade
