DILI, 16 Dezembru 2025 (TATOLI) – Relatóriu Índise Presu Konsumidór (IPK) fulan-Novembru ne’ebé aprezenta husi Institutu Nasionál Estatístika Timor-Leste (INETL) rejista inflasaun 0,1% iha Novembru, kompara ho Outubru 2025 tun 0,2%.
Tuir dokumentu INETL ne’ebé Tatoli asesu, presu sa’e 0,1% tanba hetan kontribuisaun husi grupu hahán no bebidas la’ós alkoólika 0,1%, alkoól no tabaku 0,5%, no transporte 0,1%. Grupu ekipamentu no manutensaun mobiláriu uma-laran tun 0,7% no uma 0,1% sai hanesan mudansa kontráriu ba inflasaun grupu hotu mensál.
“Grupu hahán no bebida la’ós alkoólika sa’e 0,1% tanba hetan impaktu maioria husi subgrupu modo-tahan sa’e 0,7%, mina no bokur 3,7%, no na’an 0,2%”, nota ne’e haktuir.
Subgrupu foos tun 0,5%, masin-midar, marmelada, bani-been, xokolate no hahán midar tun 1,1%, susu-been, keiju no manu-tolun 0,7%, bee, bebida, jus ai-fuan no modo-tahan 1,1%, ai-fuan 0,5% no ikan no hahán tasi 0,2% sai hanesan mudansa kontráriu ba inflasaun grupu hahán no bebida la’os alkoólika ba Novembru 2025.
Iha mudansa persentajen IPK anuál sa’e 1,2% kompara entre Novembru 2025 no Novembru 2024 hetan kontribuisaun husi grupu hahán no bebida la’ós alkoólika sa’e 2,4%, edukasaun 0,4%, ekipamentu no manutensaun mobiliáriu uma-laran 0,9%, uma 1,1% no rekreasaun no kultura 0,5% ba anuál Novembru 2025.
Ba grupu transporte tun 0,5%, alkoól no tabaku 2,8%, komunikasaun 0,2% no hatais no sapatu 0,2% sai hanesan mudansa kontráriu ba inflasaun grupu hotu ba anuál Novembru 2025.
Kona-ba inflasaun tradeable sa’e 0,1% no non-tradeable sa’e mós 0,3% iha mensál kompara entre fulan-Novembru 2025 no Outubru 2025. Inflasaun tradeable sa’e 1,2% no non-tradeable sa’e mos 1,2% iha anuál kompara entre Novembru 2025 no Novembru 2024.
TATOLI
