DILI, 16 Dezembru 2025 (TATOLI)–Diretór Nasionál Servisu Prizionál no Reinsersaun Sosiál iha Ministériu Justisa (MJ), Delfio Soares informa, kondenadu na’in-tolu daudaun ne’e hela ho nia bebé iha prizaun laran, Glenu.
“Daudaun ne’e bebé na’in-tolu ne’e iha ne’ebá hela, sira nafatin simu asisténsia bázika hanesan bebé sira ne’ebé mak hetan apoiu husi Ministériu Solidaridade Sosiál no Inkluzaun. Aleinde ne’e hetan apoiu mós husi Diresaun Nasionál ne’ebé halo esforsu hodi halo jestaun oinsá para apoia labarik sira,” Delfio hateten ba Jornalista sira iha ninia knaar fatin, MJ Kolmera, Tersa ne’e.
Delfio dehan, kondenadu na’in-tolu ne’e molok ne’e grávida ona iha li’ur, hafoin ne’e mak hetan kondenasaun hodi tama prizaun.
“Sira iha situasaun grávida ne’e antes sira tama mai iha prizaun laran, signifika hotuhotu akontese ona iha li’ur, mai mak partu mak iha ne’ebá (prizaun laran),” nia akresenta.
Notísia relevante : PNTL Oekusi rejista kazu 300-resin, na’in-13 tama prizaun
Nia esplika, bainhira labarik sira ne’e ho idade atinje ona tinan-rua ka tolu, labarik sira bele ba hela ho sira-nia família.
Diretór Nasionál hatutan, estabelesimentu prizionál tolu kaer prisípiu boot ida mak hanesan tratamentu dignu.
“Bainhira sira iha prosesu partu, ita sempre nafatin fasilita ,” nia relata.
Estabelesimentu prizionál tolu bainhira hetan situasaun sira ne’e, sira sempre komunika ba klínika besik.
“Bainhira bebé sira ne’e moris, durante ha’u rona informasaun katak labarik sira ne’e mós saudável no saúde di’ak, entaun prizaun nafatin halo liña koordenasaun ho ministériu relevante,” nia katak.
Nia dehan, kondenadu na’in-tolu ne’ebé hela ho sira-nia oan na’in-tolu iha prizaun, sira-nia moldura penál ne’e ki’ik.
“Hau la serteza sira ne’e halo krime saida saida, jeralmente la’os krime todan,” Diretór akresenta.
Jornalista : Natalino Costa
Editora : Julia Chatarina
