Uma-kain 6.537 iha Bobonaru asesu enerjia elétrika iha tinan ne’e
BOBONARU, 16 Dezembru 2025 (TATOLI)-Eletrisidade Timor-Leste, Empreza Públika (EDTL, E.P), liuhusi Projetu Eletrifikasaun Nasionál no Komunitária fornese, iha tinan ne’e, enerjia elétrika ba uma-kain 6.537 iha munisípiu Bobonaru.
Supervizór EDTL Bobonaru, Mário de Jesus, konfirma katak benefisiáriu sira ne’e mai husi aldeia 64, suku 21, husi postu administrativu Loloto’e suku (3) aldeia (7) no uma-kain 610, postu Bobonaru suku (3), aldeia (9), uma-kain 1.245, postu Kailaku suku (5), aldeia 13, no uma-kain 2.277.
Postu Balibó suku (5) aldeia 10 no uma-kain 1.155, Atabae suku (3) aldeia (9) no família 510 no postu Maliana suku (3), aldeia (6) no uma-kain 740.
Notísia relevante: Uma-kain 146 iha Leber hetan ona naroman eletrisidade
“Ha’u hakarak esklarese munisípiu Bobonaru iha postu administrativu neen, suku 50, aldeia 193. Ha’u bele dehan katak 100% suku 50 liña eletrisidade kobre hotu ona no hela aldeia haat mak seidauk asesu ne’e mak ninia rasio ne’e 98%”, nia informa ba Tatoli, ohin.
Planu EDTL nian ba 2026 sei instala mós enerjia elétrika iha aldeia Oburu, suku Deu-det, postu administrativu Lolotoe, aldeia Galitaz, suku Lour, postu Bobonaru, aldeia Raifun-Foho, suku Raifun, postu Maliana no aldeia Faturui, suku Leolima, postu Balibó, inklui subaldeia no bairru sira ne’ebé eziste iha Bobonaru.
“Tinan oin mai ha’u bele garante katak munisípiu Bobonaru ahi kobre hotu ona bairru no aldeia sira to’o rurál”, nia garante.
Iha tinan ne’e, EDTL Bobonaru halibur reseita rihun $840 husi kliente sira ne’ebé sosa pulsa iha sentru venda, halo ligasaun foun, no ligasaun ilegál.
Notísia relevante: EDTL fornese ona enerjia elétrika ba uma-kain 1,676 iha Bobonaro
Jornalista: Sergio da Cruz
Editora: Maria Auxiliadora
