DILI, 17 Dezembru 2025 (TATOLI)—Primeiru-Ministru (PM) Interinu, Mariano Assanami Sabino, orienta ona ekipa médiku hosi Ministériu Saúde (MS) atu fó asisténsia ba vítima asidente tráfegu ne’ebé baku-fila iha área Waisá, Aldeia Ossua, Suku Tirilolo, Postu Administrativu Baukau Vila, Tersa (16/12/2025).
“Ha’u nu’udár Primeiru-Ministru Interinu orienta ona Ministériu Saúde atu tau-matan no haree salva lalais ita-nia maluk sira-ne’e,” Assanami dehan ba jornalista sira hafoin ramata Abertura Segundu Kongresu CCLN iha Salaun Três de Março Maubai, Komoro, Kuarta ne’e.
Mariano “Assanami” Sabino hato’o kondolénsia ba akontesimentu asidente tráfegu ne’e ne’ebé rezulta ema na’in-tolu lakon vida no balun kanek.
Notísia relevante: Asidente tráfegu iha Waisá rezulta ema na’in-tolu lakon vida
Ho asidente tráfegu ne’e, Governante ne’e apela ba motorista tantu lori transporte públiku no privadu atu halai ho velosidade ne’ebé neneik, nune’e evita asidente sira hanesan ne’e.
“Husu ba joven sira estrada di’ak ona tenke utiliza halo didi’ak no kuidadu, la’ós halai arbiru afeta ema-nia vida,” Vise Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu ne’e dehan.
Asidente ne’e akontese purvolta tuku 13:03 Otl iha-ne’ebé karreta kamioneta ho xapa matríkula A.56.916 husi diresaun Postu Administrativu Ossu, Munisípiu Vikeke bá Dili ne’ebé suspeitu karreta referida derepente laiha travaun.
Vítima na’in-tolu ne’ebé lakon vida kompostu mane-rua no feto-ida ne’ebé hakotu iis iha lokál asidente, enkuantu ema 20-resin mak hetan kanek kamaan no todan.
Jornalista: Osória Marques
Editór: Xisto Freitas da Piedade
