CAC identifika projetu hamutuk 60-resin inkomprimentu ba kontratu
DILI, 17 Dezembru 2025 (TATOLI)—Komisaun Antí-Korrupsaun (CAC, sigla portugés) rejista projetu hamutuk 60 inkomprimentu ba kontratu.
“Projetu sira iha munisípiu barak mak serbisu la tuir termu kontratu, la tuir termu kontratu iha oioin. Dadus ne’ebé maka ami iha iha projetu hamutuk 100-resin ne’e iha territóriu, maibé CAC halo identifikasaun ne’e iha projetu 60-resin mak inkomprimementu ba kontratu. Ko’alia kona-ba irregularidade laiha maibé inkomprimentu signifika serbisu la tuir tempu ne’ebé iha kontratu laran, ne’e irregularidade no inkomprimentu kontratu,” Komisáriu interinu CAC, Miguel Acacio Faria hato’o ba Jornalista sira iha ninia knaar fatin, Kuarta ne’e.
Projetu sira ne’ebé inkomprimentu mak projetu balun la tuir Bill of Quantity (BoQ) iha seluk fali mós la tuir progresu serbisu, hanesan iha projetu sira ne’ebé CAC identifika foin 20%, maibé pagamentu 50% ona.
“Signifika katak buat ruma laloos iha ne’ebá. Ita la halo negosiasaun kona-ba ida-ne’e. Ita mai prepara relatóriu no xefe ekipa asina haruka ba Komisáriu foti desizaun, rekolla informasaun no loke investigasaun. Kuaze projetu sira ne’ebé ami halo inspesaun no monitorizasaun ne’e iha projetu 60-resin mak inkomprimentu kontratu, serbisu la tuir kontratu ne’ebé termina, ne’e signifika kontratu fó tinan-ida, serbisu tinan-tolu ka tinan-haat, projetu ne’e ongoin hela de’it, balun serbisu laiha kualidade duni,” nia akresenta.
Notísia relevante : CAC identifika irregularidade projetu lima iha Vikeke
Bainhira ekipa CAC identifika iha inkomprimentu kontratu maka sei bolu mai edifísiu Farol hodi fó opsaun rua, hakarak kontinua projetu ka loke projetu.
“Entaun maioria kontinua fali projetu ida-ne’e. Mas husi CAC nia deskobrimentu ida-ne’e mak kuaze kooperasaun husi Autoridade lokál, munisípiu, postu, aldeia, inklui komunidade, entaun empreza ba hala’o fali serbisu normál filafali ne’e kuaze maioria,” nia katak.
Nia dehan, iha empreza balun mak lakohi kontinua projetu ne’e tanba dalaruma infrasaun iha empreza laran ne’e dezastre no empreza maioria mak abandona projetu.
“Mas ita tuun iha terrenu ita rezolve tanba hamosu tuir prejuizu ba nasaun tanba halo ona pagamentu ba konstrusaun, ita bolu empreza mai, ita bolu Xefe Suku sira mai nomós ho Autoride Munisípiu sira fó opsaun,” nia katak.
Jornalista : Natalino Costa
Editora : Julia Chatarina
