DILI, 17 Dezembru 2025 (TATOLI)—Diretór Servisu Nasionál Ambulánsia Emerjénsia no Médikamentu, Institutu Públiku (SNAEM, I.P), Simplicio Amaral, hateten ekipa SNAEM evakua benifisiáriu veteranu na’in-hitu ne’ebé monu iha iha edifisiu Minsitériu Asuntu Kombatetente Libertasaun Nasionál (MACLN) ba Sentru saúde Komoro no HNGV.
“Hahú iha loron 15 Dezembru ita evakua uluk ita-nia benifisiariu veteranu tinan 2009 hamutuk na’in-hitu, tanba sira dudu malu no balun loron manas halo oin halai,” Simplicio Amaral dehan ba jornalista sira iha, Kaikoli, ohin.
Nia dehan, dadus ne’e dadus loron 15 Dezembru nian ida horisehik nian dadus seidauk tama tanba ne’e ekipa sira nafatin mantein iha ne’eba hodi asegura benifisiariu sira.
“Benifisiariu sira monu ne’e ekipa SNAEM halo kedas intervensaun no tau krareta ambulánsia rua (2), pesoál médiku, enfermeiru inklui motorista no halo kedas atendementu iha fatin akontesementu,” nia dehan.
Nia esplika, benifisiariu veteran/a sira-ne’ebé monu ne’e balun grave, tanba sira idade hotu ona no balun mai la matabisu, entaun sira hetan moras no ekipa sira tau soru kedas no halo evkuasaun kedas ba iha sentru saúde Komoro no balun ne’ebé mak grave tuan halo transferénsia kedas mai iha Hospitál Nasionál Guido Valadares, maibe tuir informsaun katak dehan mate ne’e laiha ne’e informasaun la loos.
“Totál pasiente sira-ne’ebé mak ita-nia ekipa sira atende iha terenu ne’eba hamutuk na’in-hitu kompostu husi veteranu mane na’in-rua (2) no feto na’in-lima (5) sira-ne’e maiória idade 60 ba leten,” nia relata.
Nia dehan, husi sira na’in-hitu (7) ne’e, na’in-lima (5) mak ekipa SNAEM evakua ba sentru saúde Komoro no na’in-rua (2) mak evakua ba Hospital Nasionál Guido Valadares,” nia informa.
Nia subliña, ekipa SNAEM nafatin destaka iha fatin ne’eba to’o pagamentu ne’e ramata, nune’e bele asegura benifisiariu sira liuliu sira-ne’ebé mak idade tama ona ba 50 ba leten.
“To’o agora ita-nia pesoál saúde ne’ebé destaka iha ne’eba hamutuk ho sira estasaun Komoro hamutuk na’in-sia (9) no husi sira-ne’e médiku na’in-rua (2), enfermeiru na’in-lima (5) no motorista nain-rua (2),” nia dehan.
Jornalista : Felicidade Ximenes
Editór : Cancio Ximenes
