KOVALIMA, 17 Dezembru 2025 (TATOLI)- Ema deskoñesidu tuda rahun vídru janela iha edifísiu sentru atendimentu balkaun úniku no foti subar bomba bee (sanio), iha loron sábadu, loron 13 Dezembru, iha Munisípiu Kovalima.
“Tuir lolos ita kontente tanba Governu konstrui edifísiu ne’e atu fasilita komunidade no joven sira trata dokumentu sira hanesan passaporte no dokumentu importante seluk. Maibé ita Kovalima-oan rasik maka estraga liuliu tuda rahun janela nia vídru foti na’on sanio ka bomba bee nian”, Prezidente Autoridade Munisípiu Kovalima, Miguel Armada Cardoso hato’o deklarasaun ne’e ba Jornalista iha AMC, ohin.
Notísia relevante:MAE inaugura sentru atendimentu balkaun úniku iha Kovalima
Ho akotesimentu ne’e, PAM husu ba komunidade liuliu joven-sira hela besik sentru atendimentu balkaun úniku (BU) atu labele estraga tanba ne’e patrimóniu Estadu atu populasaun bele uza tuir nia nesesidade.
“Ha’u koordena ona ho parte seguransa liuliu Polisía atu halo investigasaun hodi hetan autór ba kazu ne’e tanba estraga sasan Estadu nia”, nia afirma.
Iha biban hanesan, Komandante PNTL Munisípiu Kovalima, Superintendente Polísia Inacio Amaral, dehan polísia simu ona keixa kona-ba asuntu ema deskoñesidu tuda rahun vidru referidu.
“Hafoin simu ona keixa, ita orienta Task force no sesaun investigasaun ba iha fatin akontesimentu hodi identifika katak loos duni vidru Janela tolu maka hetan estragu”, nia Informa.
Komandante ne’e informa, parte seguransa edifísiu ne’e mós deklara katak nia la konsege hetan autór tuda rahun tanba akontesimentu ne’e iha tuku 03:30 matrugada.
“Ho nune’e, Ita rekolla informasaun liuhusi servisu sekreta no ita konsege deteta hodi halo identifika ba sidadaun na’in-tolu no hodi aplika Termu Identidade rezidénsia (TIR) hodi loke prosesu no PNTL Kovalima rejista ona kazu ne’e iha Ministériu Públiku iha segunda loron 15 Dezembru ne’e ho númeru rejistu ( NUC) 0080 ho kódigu Suai”, nia relata.
Daudaun ne’e, Servisu sekreta sira kontinua buka tuir autór loos hodi halo detensaun no prosesu tuir lei ne’ebé vigora tanba estraga patrimóniu Estadu kontra lei.
Notísia relevante: Governu inaugura sentru atendimentu balkaun úniku iha Dili
Jornalista:Celestina Teles
Editór:Florencio Miranda Ximenes
