DILI, 03 Abríl 2025 (TATOLI)-Governu liuhusi Ministru Administrasaun Estatál (MAE), Tomas Cabral, akompaña hosi Prezidente Repúblika, José Ramos Horta, Primeiru Ministru, Kay Rala Xanana Gusmão, membru Governu sira, kinta ne’e, inaugura sentru atendimentu balkaun úniku iha munisípiu Dili.
“Ohin ita lansa ona balkaun uniku iha Dili ba dalimak nian, dahuluk Manatutu, Baukau, Likisá, Ataúru no ohin Dili”, Diretora Jerál ba Simplifikasaun no Modernizasaun Administrasaun Lokál, Maria Gorete Belo, dehan iha autoridade munisípiu Dili.
Nia dehan balkaun úniku ba Dili finansia husi Uniaun Europeia, maibé Governu Timor-Leste mós kontribui pursentu lima, UCCLA (União das Cidades Capitais de Lingua Portuguesa) implementa tanba uza parseria ida-ne’ebé mak antes iha munisípiu Dili ho kámara munisipál Lisboa.
Tomas Cabral hatutan tanba Dili ho populasaun rihun 335, ida-ne’e tenke loke fatin rua. “Munisípiu lima mak loke ona, hanesan Manatutu, Baukau, Likisá, Ataúru, ohin iha Dili. Aileu, Ainaru, Manufahi, Kovalima, sei remata iha fulan-Juñu, depois kontinua fali Bobonaru, Ermera, Oekusi, Lautein, Vikeke. Tinan ne’e sei remata ba sentru sira-ne’e tanba ita halo atendimentu besik liu ba populasaun. Ataúru mak laiha tanba difisil atu mai halo. Maibé ita estabelese ona iha Ataúru depois mai Dili”, nia dehan.
PM, Kay Rala Xanana Gusmão, apresia ho esforsu ministériu no autoridade sira ne’ebé bele implementa ona balkaun úniku.
“Balkaun úniku ne’e mai ajuda tebetebes, fasilita servisu, fasilita ema ne’ebé hela dook no presiza lalais karik, tanba lae ita mak hein no hein. Ida-ne’e labele mosu kartaun eleitorál rua-rua. Ho ida-ne’e servisu ita la-bosok malu, ida-ne’e di’ak tebes”, PM dehan.
Alende ne’e MAE sei tau karreta ida kada sentru. Nune’e sei abranje ba unidade jeografia kapitál munisípiu sira.
Notísia relevante: PM Xanana inaugura balkaun úniku iha Ataúru
Jornalista : Osória Marques
Editora : Rita Almeida
