DILI, 17 Dezembru 2025 (TATOLI)-Estudante Eskola Sekundária Téknika Informátika (ETI) na’in-10 ne’ebé kompostu husi feto na’in-haat (4) no mane na’in neen (6) hala’o estájiu prátika durante fulan tolu iha Agência Notisioza Tatoli, Institutu Públikhu (TATOLI, I.P).
Estudante husi klase 11° husi Departamentu Tékniku Konstrusaun Sivíl no Administrasaun Finansa, sei hala’o sira-nia estudu prátika durante fulan tolu iha área rua mak ida kona-ba apoiu servisu administrasaun no seluk fali apoiu kona-ba servisu enjinéria sivíl ba konstrusaun edifísiu foun Agência Tatoli iha Faról, ne’ebé konstrui husi empreza Leldu Rodrigues Unipesoál, Lda.
Enjiñeiru Empreza Leldu Rodrigues Unipesoál, Lda, Jeraldo Mendonça Menezes, hateten estudante sira-ne’e mai hala’o sira-nia estájiu prátika iha ne’e hodi kompleta sira-nia estudu teória iha ne’ebé sira aprende durante ne’e iha eskola.
“Molok sira atu mai estájiu iha ne’e hetan koñesementu husi Tatoli molok empreza simu sira hodi hala’o estájiu hamutuk ho ami iha ne’e. Fiar katak ami sei bele servisu hamutuk ho di’ak iha prosesu ida-ne’e,” enjiñeiru ne’e informa ba Agência Tatoli, iha Faról, ohin.
Nia konsidera, envolvimentu husi estudante sira-nia ba prosesu implementasaun projetu ne’e lasai impedimentu ba traballadór husi empreza nian tanba sira sei halo jestaun di’ak hodi kompleta malu iha servisu ida-ne’e no sira mós sei halo avaliasaun interna entre empreza ho estudante sira hodi ajuda sira-nia dezempenha servisu iha terrenu ho di’ak.
Iha biban ne’e, reprezentante estudante estajiada ETI, Iria do Rosário de Carvalho, afirma objetivu husi sira-nia partisipasaun iha ne’e atu kompleta sira-nia estudu teória niann ne’ebé durante ne’e sira aprende iha área enjinéria sivíl no iha administrasaun finansa
“Ami sei hala’o estájiu iha ne’e durante fulan tolu hodi aprende kona-ba enjinéria sivíl, nune’e ami mai aprende kona-ba dezeñu konstrusaun ruma no halo uma, maske nu’udar feto maibé iha mehi atu sai enjineira hodi kompete ho mane sira,” estudante ne’e relata.
Nia garante, durante estájiu iha fatin ida-ne’e sira sei koopera ho empreza hodi hatudu atitude no dezempenu servisu ne’ebé mak di’ak atu nune’e bainhira ramata sira bele hetan benefísiu durante fulan tolu nia laran.
“Ami sei hala’o estájiu ho di’ak, satán Tatoli bele loke oportunidade hodi simu ami halo estájiu prátika nian, tanba ami buka iha fatin seluk ema lasimu ami,” nia hateten.
Jornalista : Alexandra da Costa
Editór : Cancio Ximenes
