DILI, 17 Dezembru 2025 (TATOLI) – Ministériu Saúde (MS), tuir planu, sei konstrui Ospitál Munisipál rua no Ospitál Psikatria rua – ida iha Munisípiu Ermera no ida seluk iha Munisípiu Manufahi, daudaun ne’e hahú ona nia prosesu dezeñu no hafoin hotu sei loke konkursu públiku atu bele halo kontrusaun.
Diretora Jerál Jestaun Projetu iha Ministériu Saúde, Aldeia Maria Barreto, hato’o katak realsiona ho planu atu halo kontrusaun ba Ospitál Munisípal rua no Ospitál Psikatria ida iha Munisípiu Ermera no Manufahi daudaun ne’e iha ona prosesu dezeñu, hafoin hotu sei loke aprovizionamentu ba públiku atu bele halo kontrusaun.
“Kona ba ospitál Munisípal daudaun ne’e ita iha ona DDI, ba iha ospitál Munisipál Letefoho, Ermera, no Luak Manufahi no Ospitál Psikatria iha Gleno, tanba ne’e mak daudaun iha hela prosesu dezeñu; ne’e hotu, ita foin loke fali aprovizionamentu ba iha nia kontrusaun,” Diretóra Jerál Jestaun Projetu MS, Aldeia Maria Barreto ba Jornalista sira, iha Salaun Koffi Aban, Kaikoli, ohin.
Nia esplika, dezeñu ne’e normalmente sempre ho durasaun fulan-neen to’o tinan-ida maibé ida agora ne’e foin mak fulan-tolu.
“Dezeñu ne’e normalmente nia la bele menus husi fulan-neen, ne’ebé nia bele fulan-neen to’o tinan-ida. Ne’ebé, ita bele konta loloos husi nia inisia ne’e nia foin ba iha fulan-tolu,” nia afirma.
Ezekutiva ne’e relata, iha ospitál tolu iha munisípiu rua ne’e MS halo lansamentu hotu dala ida, tanba ambisaun husi Nonu Govenu konstitusionál hakarak tenke lansa hotu dala ida.
“Ambisaun husi Governu da-sia ne’e katak ita hakarak lansa ospitál tolu ne’e hanesan ospitál Munisípál rua no Psikatria ida-ne’e atu nune’e bele atende ba ita-nia pasiente sira-nia nesesidade, tanba ita-nia maluk Timór barak hela iha área rurál, la’ós ema iha família ne’ebé mak iha Dili, entaun bainhira ita iha atendimentu di’ak iha nasionál no Munisípiu tanba ita la bele kontribui,” nia dehan.
Dezeñu ne’e rasik Ministériu Saúde kontrata konsultór sira husi rai-li’ur no mós Timoroan iha rai-laran.
“Orsamentu ne’e uza OJE husi Ministériu Saúde ba iha projetu tolu ne’e no ospitál tolu nian orsamentu ba kontrusaun ha’u labele temi tanba bazeia ba dezeñu foin ita hateten kustu estimasaun tanba ida-ne’e ita-nia Governu ninia osan rasik. Se iha doadór balun ne’ebé hakarak atu apoiu konstrusaun ospitál hanesan Timoroan, ita simu,” nia konklui.
Jornalista : Felicidade Ximenes
Editór: Cancio Ximenes
