BOBONARU, 17 Dezembru 2025 (TATOLI)- Deputadu sira husi Komisaun C ba Asuntu Finansa Públika iha Parlamentu Nasionál (PN) hala’o fiskalizasaun ba autoridade munisípiu Bobonaru hodi haree ezekusaun Orsamentu Jerál Estadu (OJE) 2025, parte ida atu garante transparénsia.
Fiskalizasaun parlamentár ne’e haree ba implementasaun no utilizasaun orsamentu Estadu ba dezempeñu Governu lokál.
Prezidente Komisaun C, Cedelízia Faria dos Santos, esplika objetivu vizita ne’e atu kumpre mandatu Parlamentu nian foti desizaun polítika, halo lei no fiskalizasaun iha terrenu, partikularmente kona-ba prosesu orsamentu.
Notísia relevante:Ezekusaun OJE 2025 iha Autoridade Bobonaru atinje 84%
“Hala’o ami-nia papél fiskalizasaun, akompaña prosesu orsamentu husi aprovasaun to’o implementasaun, inklui fó asisténsia iha implementasaun”, nia hateten iha salaun enkontru Autoridade Munisípiu Bobonaru, ohin.
Deputada ne’e salienta katak Komisaun mós haree ba empréstimu no doasaun ne’ebé Governu lokál simu no halo monitorizasaun ba aprovizionamentu, manutensaun no fornesimentu kombustivel iha bens no serbisu, despeza kapitál dezenvolvimentu no kapitál menór.
“Ami hakarak garante katak prosesu tomak hala’o tuir prosedimentu no regulamentu sira ne’ebé aplikavel”, dehan.
Prezidente Autoridade Munisípiu Bobonaru, Paulo Moniz Maia, hato’o apresiasaun no agradesimentu ba Komisaun ninia vizita no fiskalizasaun.
Durante vizita ne’e, parte autoridade liuhusi diresaun servisu hothotu rona no hatán ona ba sujestaun no pedidu sira husi membru Parlamentu sira, hodi garante katak implementasaun programa no utilizasaun orsamentu iha futuru bele hala’o ho efetivu liután, transparénsia no tuir provizaun legál sira ne’ebé aplikavel.
“Ida-ne’e mak ita hothotu hakarak atu orsamentu ne’e bele uza ho di’ak no tuir lei ne’ebé iha”, nia realsa.
Iha tinan fiskál 2025, Autoridade Munisípiu Bobonaru hetan alokasaun orsamentu $11.308.414, ne’ebé daudaun ezekuta ona $9.978.5440 (95,7%), obrigasaun $848.281,79, kompromisu $31.447,16 no balansu $450.141,05.
Montante orsamentu ne’e fahe ba kategória saláriu no vensimentu $2.761.552, gastu $2.534.808,42 (91%) no balansu $226.743,58, bens no serbisu $1.377.833, gastu $945.527,17 (86%), obrigasaun $219.486,23, no kompromisu $19.960,68, transferénsia públika $5.383.247, gastu $5.332.086,48 (99%), kompromisu $1.800,02, balansu $44.287,90.
Kapitál menór rihun $500, gastu rihun $426.900 (98%), obrigasaun $102.831, kompromisu $9.689,11 no balansu $100,06, no kapitál dezenvolvimentu $1.285.782, gastu $739.221,93 (98,4%), obeigasaun $525.964,56, kompromisu $0,35 no balansu $20.595,16. Orsamentu ne’e finansia programa 16, subprograma 35 no atividade 80.
Notísia relevante: Ezekusaun OJE 2025 iha Autoridade Bobonaru atinje ona 61%
Jornalista: Sergio da Cruz
Editora: Maria Auxiliadora
