DILI, 17 Dezembru 2025 (TATOLI)-Deputadu Komisaun G iha Parlamentu Nasionál ne’ebé trata Asuntu Edukasaun, Juventude, Desportu no Sidadania, Mateus da Cruz, husu ba Reitór foun Universidade Nasionál Timor-Leste (UNTL), Joviano António da Costa, atu presta atensaun ba hadi’ak kondisaun iha universidade hodi mellora prosesu ensinu aprendizajen.
Deputadu husi Partidu Kongresu Nasionál Rekonstrusaun Timorense ne’e parabeniza Reitór foun UNTL no iha esperansa boot durante iha mandatu rezolve situasaun universidade públika ne’e no tenke sai sentru eselente.
Nia problema iha universida mak falta dosente no saladeaula, manorin balun kontinua sai kontratadu maski hala’o funsaun tinan barak ona. “Ho Reitór foun, situasaun ne’e bele garante dosente ne’ebé iha kada departamentu”, nia hato’o.
Lembra katak, iha 12 Dezembru 2025, Joviano António da Costa eleitu nu’udar Reitór UNTL ba periódu 2026-2031 hodi subtitui Reitór atuál João Soares Martins.
Joviano António da Costa hafoin eleitu kompromete kontinua planu di’ak ne’ebé iha ona no hakarak lori UNTL ba futuru ida-ne’ebé eselente.
“Ha’u sei la la’o mesak, maibé sei serbisu hamutuk ho estrutura atu hadi’a UNTL sai universidade ne’ebé kualidade no eselente hanesan ho universidade sira seluk iha mundu, liuliu iha Asosiasaun Nasaun Sudeste Aziátiku”, nia deklara.
Atu atinje kompromisu ida-ne’e, Joviano dehan nia sei eleva kualidade rekursu umanu, infraestrutura, kooperasaun nasionál no internasionál.
Joviano António da Costa lisensiadu iha área Enjeñaria Mekánika iha Malang, Indonézia, Mestradu iha área Enjeñaria Mekánika iha Nagahoka University, Japaun, no doutoradu iha área ida-ne’e (Mekánika) iha Universidade do Porto, Portugál.
Iha 2024, eleitu nu’udár Diretór Kursu Mestradu Enjeñaria iha UNTL, apoia husi Japan International Cooperation Agency (JICA).
Notisia relevante: https://tatoli.tl/2025/12/12/joviano-antonio-da-costa-eleitu-sai-reitor-untl/
Jornalista: Nelson de Sousa
Editora: Maria Auxiliadora
