KOVALIMA, 17 Dezembru 2025 (TATOLI)-Sekretáriu Estadu Formasaun Profisionál no Empregu (SEFOPE), kuarta ne’e, atribui sertifikadu lian inglés ba formandu hamutuk 219 ne’ebé maka tuir ona formasaun durante fulan-tolu iha sentru formasaun Lakonak, Postu Suai, munisípiu Kovalima.
Diretór Jerál SEFOPE, Carlito Rosário Cabral hateten, hafoin simu sertifikadu ne’e la signifika formandu sira otomátikamente tama iha programa mobilidade traballu ka Pacific Australia Labour Mobility (PALM, sigla inglés) hodi servisu.
“Ohin ita-boot sira simu sertifikadu hodi husu kedas ba Diretór SEFOPE Munisípiu no Diretór Jerál SEFOPE, bainhira maka atu bá Austrália, ita-boot sira presiza atu komprende prosesu tanba kandidatu iha tinan 2019 no tinan kotuk mós sei barak,” Nia hateten iha salaun eskola sekundáriu jeràl públiku Suai.
Ba formandu sira ne’ebé oras ne’e simu ona sertifikadu formasaun iha lian inglés atu kontinua servisu no hala’o atividade hanesan baibain iha Timor-Leste molok hetan kontratu formal husi kompañia sira iha Austrália.
“SEFOPE sei fó sai avizu ba kandidatu traballadór sira no presiza tempu durante fulan-rua atu kria númeru referénsia ba kandidatu traballadór Austrália ne’ebé maka finaliza ona kursu dalén inglés ba faze dahuluk,”tenik tan.
Reprezenta Autoridade Munisípiu Kovalima, Luzinho do Rego orgullu ba polítika SEFOPE nian ne’ebé maka fó ona formasaun ba joven sira iha iha Kovalima no haruka bá servisu iha Austrália.
“Ami orgullu tanba Polítika SEFOPE lori sentru formasaun dalén inglés mai hakbesik iha ita-nia munisípiu Kovalima joven-sira atu tuir formasaun la presiza ba nasionál,” nia hateten.
Reprezentante formadu, Efigenia de Araújo apresia ba polítika SEFOPE loke sentru formasaun dalén inglés ba joven-sira iha munisípiu Kovalima.
“ Ha’u reprezentate formandu sira hato’o apresiasaun ba polítika SEFOPE loke sentru formasaun dalén inglés ba ami nune’e ami bele iha koñesimentu uitoan kona-bá dalén inglés “nia hateten.
Notísia relevante: SEFOPE realiza ona teste lian inglés ba kandidatu traballadór iha munisípiu hitu
Jornalista:Celestina Teles
Editór:Florencio Miranda Ximenes
