Xanana konsidera negosiasaun fronteira marítima hatudu kooperasaun di’ak entre TL-Indonézia
DILI, 17 Dezembru 2025 (TATOLI)—Primeiru-Ministru, Kay Rala Xanana Gusmão, konsidera negosiasaun ronda daruak ba fronteira marítima iha Jogjakarta hatudu espíritu kooperasaun ne’ebé di’ak entre Timor-Leste ho Indonézia.
Primeiru-Ministru, Kay Rala Xanana Gusmão, hateten viajen servisu ba iha Jogjakarta Indonézia nu’udar pasu dahuluk hodi halo enkontru formál ba negosiasaun fronteira marítima ho Indonézia.
Nia dehan, labele hanoin prosesu sira-ne’e fasíl no lalais de’it tanba atu ukun-an dezde portugés sira sei iha ne’e mós fatin barak hanesan fronteira marítima no terrestre sei nafatin iha problema.
“Maibé ita bele dehan katak ho xefe delegasaun Indonézia nian ne’ebé ho ninia maneira abertura hodi fó biban ba ita diskute buat barak, ida-ne’e maka ha’u bele dehan katak diskusaun pozitiva di’ak katak ita simu malu iha enkontru formál sesaun dahuluk nian,” Primeiru-Ministru, Kay Rala Xanana Gusmão, hateten ba jornalista sira iha sala VIP, Aeroportu Internasionál Prezidente Repúblika Nicolau Lobato, Komoro, ohin.
Kona-ba fronteira, tuir nia, maske negosiasaun ne’e kle’ur maibé ho espiritu kooperaaun husi parte Indonézia, entaun sei akontese tan negosiasaun fronteira marítima ne’e iha fulan-Abríl 2026, tanba sira sei iha siklu relijiozu nian entaun iha determina fulan-Abríl mak iha fali enkontru formál tuir mai tan.
Notísia Relevante: Xanana: “Ha’u espera negosiasaun tuir mai iha Abríl 2026”
Jornalista : Alexandra da Costa
Editór : Cancio Ximenes
