VIKEKE, 18 Dezembru 2025 (TATOLI)—Xefe Suku Makadike de Baixo, Postu Administrativu Uatulari, Munisípiu Vikeke, Rogério da Silva, solisita Sekretariadu Tékniku Administrsaun Eleitorál (STAE) kontinua implementa atendimentu eleitorál biométriku movel ba sidadaun ho idade elijível iha suku sira.
“Ha’u hakarak husu parte STAE kontinua implementa atendimentu movel ba suku sira atu ita-nia komunidade eleitór foun sira bele prodús sira-nia kartaun eleitorál no fasilita mós eleitór barak ne’ebé seidauk muda kartaun eleitorál tuan ba biométriku,” Rogério ba TATOLI iha resintu Autoridade Munisipál Vikeke, Kinta ne’e.
Nune’e mós, autoridade lokál ne’e rekomenda bainhira halo atendimentu movel ba suku tenke koordena mós parte diresaun notariadu, atu fasilita komunidade trata dokumentu no Billete Identidade (BI) tanba ho dokumentu rua ne’e mak foin bele trata kartaun eleitorál.
Iha parte seluk, Xefe Suku Matahoi, Postu Uatulari, António Amaral, sujere STAE presiza halo atendimentu direta ba komunidade ne’ebé la’o labele ka alejadu atu sira bele hetan dokumentu hanesan BI, sertidaun moris no kartaun eleitorál.
“Iha ha’u-nia suku ema la’o labele ne’e iha na’in-lima (5) ne’ebé oras ne’e seidauk iha dokumentu sira-ne’e. Tan ne’e, ha’u husu parte relevante sira presiza bá halo atendimentu direta iha uma atu sira bele trata sira-nia dokumentu,” nia fó-hanoin.
Iha biban ne’e, Ofisiál Sekretáriu Suku Vessoru, Postu Uatulari, Ilídio Amaral, husu STAE kria tan atendimentu movel ba postu, maibé ba liu suku hodi komunidade sira la’o labele ne’e sira bele trata sira-nia kartaun eleitorál biométriku.
Hatán ba preokupasun ne’e, Diretór STAE Munisípiu Vikeke, Humberto Fernandes, hateten ba tinan 2026, STAE sei halo aproximasaun ba Autoridade Munisípiu Vikeke atu halo atendimentu movel ba suku sira hodi prodús eleitorál biométriku.
“Ha’u mós sente ita halo atividade movel mak foin rezolve duni, maibé ita presiza envolve mós parte notariadu,” nia tenik.
Nia haktuir, antes ne’e STAE halo ona atendimentu movel ba postu administrativu lima (5) iha Munisípiu Vikeke maibé seidauk kobre hotu, nune’e tau ona ba planu tinan 2026 sei kontinua destaka bá postu hodi atualiza kartaun eleitorál.
Entretantu, tuir dadus, eleitór sira-ne’ebé atualiza ona kartaun eleitorál tuan ba sistema biométriku ne’ebé hahú implementa dezde fulan-Novembru 2024 atinje ona 15.699 no eleitór sira-ne’ebé seidauk atualiza hamutuk 46.679.
Jornalista: Vitorino Lopes da Costa
Editór: Xisto Freitas da Piedade
