DILI, 18 Dezembru 2025 (TATOLI)–Asidente tráfegu entre kareta bus rua xoke malu iha área Wailakama, Suku Vemasse Tasi, Postu Administrativu Vemasse, Munisípiu Baukau, Kinta ne’e, rezulta pasajeiru na’in-ida lakon vida.
Asidente tráfegu referidu akontese purvolta tuku 03:00 Otl ne’ebé envolve Bus Jocfen ho xapa matríkula 39.343 TL husi diresaun Lautein bá Dili ho bus naran Maudode ho xapa matrîkula 38.050 TL diresaun husi Dili bá Venilale.
Tuir kronolojia, bainhira to’o iha kruzamentu área Wailakama, bus Jocfen ne’ebè deskonfia kondús husi ajudante halai ho velosidade maka’as xoke Maudode ne’ebé kondisaun para, nune’e rezulta pasajeiru na’in-ida (mane) husi Lautein lakon vida, kundutór bus Maudode kanek inklui pasajeiru balun kanek grave.
“Ami haree bus ne’e tun mai taka dalan. Entaun, ha’u deside para metin. Nia mai loos iha ami-nia oin mak baku fila,” kondutór José de Sousa hateten liuhusi telefónema, Kinta ne’e.
Hafoin asidente ne’e akontese, parte Seksaun Tranzitu Rodoviáriu Polísia Nasionál Timor-Leste Munisípiu Baukau to’o iha lokál asidente hodi evaku vítima sira bá sala emerjénsia iha Ospitál Rejionál Eduardo Ximenes (HoREX-sigla portugeza) Baukau hodi halo tratamentu.
Jornalista: Natalino Belo
Editór: Xisto Freitas da Piedade
