DILI, 18 Dezembru 2025 (TATOLI)–Prezidente Tribunál Rekursu, Afonso Carmona, hateten, antigu deputadu sira-nia pedidu fiskalizasaun abstrata ba Revogasaun Lei Pensaun Mensál Vitalísia (LPMV) iha ona Juíz Prosesu nia liman.
“Primeiru ha’u ko’alia dehan ha’u la ko’alia, segundu ha’u ko’alia dehan prosesu ne’e iha Juíz nia liman ona, sira sei halo sitasaun ba parte ne’ebé fó resposta buat ne’e la’o hela,” Afonso Carmona hato’o ba Jornalista sira iha Kaikoli, Kinta ne’e.
Notísia relevante : Prezidente Ramos-Horta promulga Lei Revoga Pensaun Mensál Vitalísia
Fiskalizaun ne’e liga ona ba prosesuál, ne’ebé importante nia andamentu la’o, tanba atu avalia Juíz ne’e la’ós nia desizaun Konstituisionál ka inkonstituisionál maibé nia andamentu tuir regra ka lae.
“Regra prosesuál sei la halo buat sira ne’e bele nulu fali, nulu signifika la vale totál, se Juíz la halo nia serbisu ida-ne’e, liuliu halo fiskalizaun abtrata ba lei ne’e, Juíz saida mak ne’e, sa tan Juíz iha Tribunál Rekursu. Tanba ne’e prosesu hotu la’o tuir prazu ne’ebé termina,” nia akresenta.
Carmona dehan, hanesan Prezidente Tribunál Rekursu nia labele obriga Juíz ida atu aselera prosesu ida, nune’e entidade sé de’it labele obriga Juiz atu aselera prosesu ida. Tanba ne’e, Juíz idaidak ne’e hala’o serbisu iha prazu nia laran.
Tribunál sei la halo diálogu ho EUTL
Iha biban ne’e, Carmona afirma katak sei la halo diálogu ho Estudante Universitáriu Timor-Leste (UETL) ho razaun lei la autoriza.
“Kona-ba Estudante sira hatama karta husu diálogu, Tribunál labele fó resposta viola fali lei, maibé se Konsellu Superiór Majistradu Judisiál autoriza maka foin bele ko’alia,” nia katak.
Konsellu ne’e kompostu husi ema na’in-lima mak hanesan Prezidente Tribunál Rekursu maka nu’udar Prezidente Konsellu, iha Reprezentante Governu, Prezidente Repúblika, Parlamentu Nasionál no Tribunál.
“Sira autoriza maka foin ko’alia. Tribunál la subar buat ruma, tanba ne’e kona-ba fiskalizaun abtrata ne’e dadaun la’o hela iha Tribunál,” nia katak.
Jornalista : Natalino Costa
Editora : Julia Chatarina
