DILI, 18 Dezembru 2025 (TATOLI)—Konsellu Superiór Majistratura Judisiáriu (KSMJ) aprova no hili loron 03 Dezembru nu’udar tinan judisiáriu.
Prezidente Tribunál Rekursu, Afonso Carmona, hateten, Tribunál Timor-Leste durante tinan 23 ezisténsia seidauk iha tinan judisiáriu. Tanba ne’e, Prezidente Tribunál Rekursu ho inisiativa rasik propoin ba KSMJ hodi hamosu tinan judisiáriu ida nune’e hahú Janeiru to’o Dezembru kada tinan Tribunál bele relata nia serbisu anuál ba públiku.
“Ha’u iha referénsia barak kona-ba tinan judisiáriu. Tanba iha nasaun barak iha ano judiciário, entaun ha’u propoin ba Konsellu ita bele eskolla ano judiciário, Konsellu aseita no aprova katak dia 03 Dezembru nu’udar tinan judisiáriu,” Carmona hato’o ba Jornalista sira hafoin abertura jogu futsál iha salaun edifísiu Batalaun Orden Públiku, Kaikoli, Kinta ne’e.
Nia dehan, objetivu husi tinan judisiáriu ne’e mak Tribunál atu relata serbisu sira ba públiku kona-ba númeru kazu pendente, kazu prosesa, Juíz, ofisiál, hira mak hetan oportunidade no sae karreira, forsa traballu Tribunál inklui dezafiu no progresu sira.
”Haree ba ida tanba ida-ne’e mak ita koko para ho nasaun sira seluk hanesan sira mós iha ano judicial, Timor-Leste mós iha ano judicial, dalaruma ema la simu ida-ne’e. Hau la preukupa tanba Trinunál tenke ser iha nia atividade rasik ho nia forma rasik, tanba atu garante povu nia direitu tuir Konstituisaun haruka,” nia katak.
Notísia relevante : Alkatiri rekomenda Governu reforsa Sentru Formasaun Jurídiku no Judisiáriu
Carmona dehan, Dezembru tinan ne’e koneside nu’udar tinan dahuluk ba tinan judisiáriu ho atividade desportu, jogu amizade entre Juíz sira no ofisiál justisa inklui funsionariu sira iha Tribunál Rekursu no Tribunál Judisiál Primeira Instánsia Dili, Baukau , Suai no Oekusi.
Aleinde ne’e, iha mós misa agradesimentu ne’ebé tuir ajenda sei halo iha Sesta (19/12) dadeer no parte lorokraik sei iha sesaun solene dahuluk iha tinan judisiáriu ne’ebé hala’o iha Tribunál Primeira Instánsia Dili.
Jonalista : Natalino Costa
Editora : Julia Chatarina
