BOBONARU, 18 Dezembru 2025 (TATOLI) – Komersiante sira husu ba Governu atu tau matan ba minimerkadu Ili-bole, iha munisípiu Bobonaru, liuliu konstrui infraestrutura bázíka hanesan uma, eletrisidade, no sintina públiku.
Negosiante sira hato’o ezijénsia ne’e tanba Autoridade Munisípiu Bobonaru orienta ona Institutu Jestaun Ekipamentu no Apoia Dezenvolvimentu Infraestrura atu haluan espasu.
Notísia relevante: Negosiante balun ho konxiénsia sobu rasik ona baraka iha merkadu Ili-bole
“Ami halo fatin ne’e uza osan rasik. Foin lalais sobu tiha mak ami halo fali. Se bele Governu halo merkadu foun ida para ami fa’an sasán ho di’ak, tanba uma ida ami halo rasik ne’e uza de’it zinku, la kle’ur aat filafali. Depois ami iha ne’e, balun fila, balun toba iha ne’e, ami-nia listrik mós la tama, ami atu fa’an sasán iha tempu kalan mós la di’ak”, negosiante Inácio Bragança lamenta.
Antes ne’e, Governu kontrui ona uma merkadu, maibé la utiliza no to’o agora no abandonadu tanba harii iha fatin ne’ebé la’ós estratéjiku.
Iha sorin seluk, komunidade Rudolfo Barros de Fátima reforsa katak Governu presiza tau iha planu hodi rezolve problema hirak ne’e, liuliu eletrisidade no sanitasaun públiku.
“Sira iha ne’e barak ona mak halo negosiu, kuaze 40-resin, kompara ho uluk 10 mós la to’o. Agora problema mak sira hela iha fatin públiku mós la asesu eletrisidade, depois sintina ne’e presiza tebes tanba loron ne’e ema barak. Ita-nia nesesidade urjente ruma araska, entaun hakarak ka lakohi tenke halai ba du’ut laran”, nia dehan
Antes ne’e, Diretór Servisu Munisipál Jestaun Merkadu, Autoridade Munisípiu Bobonaru, Paulo dos Santos, relata katak atu konstrui merkadu foun ne’e liuhusi projetu PDIM no depende ba prioridade ne’ebé líder komunitáriu sira hili.
Tuir dezeñu ne’ebé tekniku Planu Dezenvolvimentu Integradu Munisipál (PDIM) Autoridade Munisípiu Bobonaru dezeña, espasu merkadu Ili-bole bele konstrui uma medida 3×4 ho unidade 63.
Notísia relevante: Governu fó prazu fulan ida ba negosiante hamamuk merkadu Ili-bole
Jornalista: Sergio da Cruz
Editora: Maria Auxiliadora
