DILI, 19 Dezembru 2025 (TATOLI)—Iha ezame nasionál ba tinan eskolár 2025, estudante Munisípiu Dili na’in-122 mak reprovadu kompostu husi Enisnu Báziku na’in-69 no Ensinu Sekundáriu Jerál na’in-53.
Diretór Edukasaun Munisípiu Dili, Sabino da Costa Pereira hateten ensinu báziku estudante ne’ebé partisipa iha ezame nasionál hamutuk 5.582. Husi númenru ne’e, estudante hamutuk na’in-69 reprovadu no na’in-5.513 aprovadu.
Ensinu Sekundáriu Jerál (ESJ), estudante ne’ebé partisipa ezame nasionál hamutuk 7.574. Ba programa Siénsia Teknolojia hamutuk 3.916, Siénsia Umanidade hamutuk 3.658. Estudante ne’ebé la partisipa Siénsia Teknolojia hamutuk 65 no Siénsia Umanidade hamutuk 97. Husi númeru ne’e, estudante ne’ebé reprovadu hamutuk na’in-53, aprovadu hamutuk na’in-7.521.
Notísia relevante: Eskola CAFE maioria sai mellór klasifikadu iha ezame nasionál, estudante la pasa hamutuk 1.118
Nia hatutan, Ensinu Sekundáriu Tékniku Vokasionál, estudante hamutuk na’in-940, maioria aprovadu iha ezame nasionál.
“Husi númeru sira-ne’ebé reprovadu, maioria ho númeru boot mak ensinu báziku husi Eskola Báziku 10 Dezembru hamutuk 21, Eskola Báziku Bidau Akadiruhun hamutuk 13, Eskola Bázika 30 de Agusto hamutuk sanulu (10). Sira seluk ne’e ho númeru ki’ik hotu,” Sabino dehan ba jornalista sira iha Eskola Sergio Vieira de Mello, Bekora, Dili, Sesta ne’e.
Nia apela ba estudante ne’ebé reprovadu ka la pasa atu nafatin esforsu hodi estuda nune’e bele ultrapasa iha tinan oin.
“Nafatin enkoraja estudante hotu ne’ebé mak la pasa atu tinan oin kontinua estuda, tama saladeaula atu aprende ho kolega sira. Tinan ne’e, sira labele ultrapasa, tinan oin tenke hadi’a estudu. Ba inan-aman mós tenke kontrola atu haree tuir oan sira ba duni eskola ka lae,” esklarese.
Ministériu Edukasaun (ME) anúnsia ona rezultadu ezame nasionál tinan eskolár 2025, ne’ebé hatudu iha estudante na’in 52.400 aprovadu no na’in-1.118 reprovadu.
Tuir dadus husi Ministériu Edukasaun, finalista husi eskola bázika na’in-25.120 mak aprovadu, ekivale ho 97,52% no la reprovadu na’in-640, ekivale ho 2,48%. Eskola Sekundária Jerál (ESJ), estudante hamutuk na’in-23.486 mak aprovadu, ekivale ho 96,82% no reprovadu iha na’in-444, ekivale ho 1.86%. Eskola Sekundária Téknika no Vokasionál estudante na’in-3.441 mak aprovadu, ekivale ho 100% no Edukasaun Rekorrente estudante hamutuk na’in-353 aprovadu, ekivale ho 91.21% no reprovadu hamutuk na’in-34, ekivale ho 8.79%.
Jornalista: Osória Marques
Editór: Xisto Freitas da Piedade
