DILI, 19 Dezembru 2025 (TATOLI)—Ministériu Públiku (MP) liuhusi Prokuradór Titulár kontinua hakle’an investigasaun ba jogu online ne’ebé akontese iha Rejiaun Administrativa Espesiál Oekusi Ambenu (RAEOA), Jita Plaza, ETO Tower iha Kolmera no Grand Dragon Lotaria.
“Kazu online iha edifísiu ETO investigasaun sei kontinua la’o. Nune’e mós kazu online iha Oekusi, Jita Plaza no Grand Dragon Lotaria iha hela parte investigasaun, agora Prokuradór Titulár sei haree hela,” Prokuradór Jerál Repúblika, Nelson de Carvalho, hato’o hafoin partisipa iha serimónia solene ‘Ano Judicial’, ne’ebé realiza iha edifísiu Tribunál Primeira Instánsia Dili, Kolmera, Sesta ne’e.
Nune’e, Prokuradór lakohi fó sai detallu kona-ba jogu online ne’e tanba iha hela prosesu investigasaun.
“Ha’u labele ko’alia, imi hatene muito bom, maibé kestaun ne’e iha faze investigasaun, ha’u labele ko’alia,” nia akresenta.
Seluk, Prokuradór Nelson sei halo prosesu hasoru investigadór Polísia Nasionál Timor-Leste (PNTL), Polísia Sientífika Investigasaun Kriminál (PCIC) no Komisaun Antí-Korrupsaun (CAC).
Tuir Prokuradór ne’ebé nu’udar na’in ba asaun penál husi ba investigadór PNTL, PCIC no CAC atu halo serbisu atuasaun sira iha terrenu tenke di’ak no tuir regra prosesuál.
Nia dehan, hanesan ekipa Autoridade Seguransa no Polísia Espesializada bainhira halo atuasaun liliu ba halo buska no apreensaun ba ema ruma labele halo vídeo no hasai foto hodi divulga iha rede sosiál.
“Kuandu halo hahalok hanesan Ministériu Públiku sei prosesa tanba ida-ne’e hanesan segredu justisa. Tuir loloos ha’u mós bele hateten kedan Polísia sira labele halo intervensaun ko’alia faktu hanesan ne’e. Ha’u la hatene ba oin nein Polísia, nein PCIC, nein CAC kuandu halo buat hotu ne’e ha’u loke prosesu hasoru sira. Ha’u hateten kedan ba ita-boot sira, regra prosesuál la’ós hanesan ne’e,” nia subliña.
Notísia relevante : PNTL klarifika kazu jogu online iha ETO Tower
Prokuradór dehan, sistema Timor-Leste nian la hanesan ho Indonézia, tanba ne’e presiza atensaun.
“Labele halo tuir fali Indonézia buser ida-ne’e depois ba ko’alia iha ne’ebá hatudu-an ne’e la loos. Ita-nia sistema la hanesan ho sira, uluk kedas Adjuntu na’in-rua fó hanoin ona ba sira, fó adverténsia ba sira, se sira hanoin nafatin hanesan ne’e, ha’u rasik sei halo prosesu hasoru sira,” nia fó hanoin.
Prokuradór Jerál Repúblika observa katak, Autoridade Seguransa sira ba halo buska no apreensaun sira la respeita regra prosesuál.
“Naran ba ko’alia ida-ne’e ida-ne’ebá katak halo apreensaun ba faktu sira ne’e. Ita-boot sira haree, dalaruma Polísia ba ko’alia faktu sira ne’e ko’alia loloos de’it, hanesan loron ida-ne’e ami tama iha ne’e preende ida-ne’e, la’ós segredu justisa,” nia tenik.
Prokuradór Nelson katak, hanesan Prokuradór Jerál nia iha koñesimentu ba kazu ilísitu online daudaun rona intervinente balun maibé tanba liga ho etika dentolojia no profosinál mak labele fó sai.
Jornalista : Natalino Costa
Editora : Julia Chatarina
