DILI, 19 Dezembru 2025 (TATOLI)–Prezidente Repúblika (PR), José Ramos-Horta nomea ona Avelino Coelho da Silva nu’udar Prezidente Komisaun Rekrutamentu ba Juíz ne’ebé sei tuur iha Supremu Tribunál Justisa (STJ).
Tuir Lei Organizasaun Judisiária artigu 83, Komisaun Rekrutamentu Juíz ne’ebé sei tuur iha STJ ne’e kompostu husi ema na’in-tolu, na’in-rua hili husi Parlamentu Nasionál no na’in-ida nomea husi Prezidente Repúblika.
Nune’e, Prezidente Komisaun Rekrutamenutu ba Juíz ne’e nomea rasik husi Prezidente Repúblika.
“Ha’u nomea ona elementu ida, Dotór Avelino Coelho, nia mak sei sai Prezidente Komisaun Rekrutamentu ba Juíz,” Prezidente Ramos-Horta hato’o hafoin abertura serimónia solene ba ‘Ano Judiciál’, 2026 ne’ebé hala’o iha Tribunál Judisiál Primeira Instánsia, Kaikoli, Sesta ne’e.
Notísia relevante : Parlamentu sei harii komisaun rekrutamentu ba instalasaun Supremu Tribunál Justisa
Xefe Estadu hili Avelino Coelho tanba konsidera nia nu’udar jurista no polítiku ne’ebé ho integridade, serví di’ak ba Estadu no nasaun. “Entaun ha’u propoin nia.”
Prezidente Ramós-Horta mós la kestiona jurista ne’e nia kapasidade, integridade no garante nia sei halo serbisu ho di’ak.
“Sim, uluk kedas desde tinan 1999, 2000 serbisu iha Governu ho Nasoes Unidas,” nia katak.
Jornalista : Natalino Costa
Editora : Julia Chatarina
