DILI, 22 Dezembru 2025 (TATOLI) – Diresaun Nasionál Transporte Terrestre (DNTT) husu ba públiku respeita sinál tránzitu nian, tanba Governu lansa ona sistema kontrolu tráfiku ne’ebé kapta infrasaun hotu iha oras no data kompletu.
Xefe Departamentu Sekretariadu Apoiu Tékniku Administrasaun DNTT, Nelson Sequeira, hateten Governu hahú ona operasionalidade sistema kontrolu tráfiku iha fulan-Outubru 2025, liuhusi instalasaun semáforu modernu iha Dili, atu kontrola sonoru parajen transporte públiku no movimentu veíkulu.
Tuir nia, hafoin lansamentu ba sistema ne’e, DNTT deteta katak públiku barak mak kontra regra tránzitu. Tanba ne’e, nia husu ba ema sira ne’ebé renova dokumentu transporte atu labele hakfodak bainhira hasoru multa, tanba sistema grava ona informasaun infrasaun sira ho detallu.
Nia esplika katak, tuir dadus provizóriu DNTT, infrasaun tránzitu ne’ebé públiku komete sei rezulta ba taxa, ne’ebé tenke selu ba Estadu liuhusi DNTT. Totál taxa ne’ebé seidauk selu husi públiku to’o agora hamutuk rihun $13.
“Ida-ne’e ami konta osan de’it konforme sira komete infrasaun, hanesan kontra traffic light, tula ema la uza kapasete no seluk tan. Bainhira mai renova dokumentu motór nia surat mate loloos nia selu $15, maibé kontra autoridade selu $46. Entaun, nia tenke seluk $60”, nia hatutan.
Nia dehan katak husi Janeiru to’o Novembru 2025, DNTT rekolla ona reseita hamutuk millaun $6,4 ba kofre Estadu, ne’ebé seidauk inklui reseita fulan-Dezembru nian.
Maski nune’e, Nelson Sequeira admite katak seidauk iha edukasaun no sensibilizasaun ne’ebé sufisiente ba públiku.
“Hamutuk PNTL, ami presiza halo sensibilizasaun barak tan ba públiku hodi hatene, tanba balun hatene regra maibé hakarak kontra no balun laiha duni informasaun”, dehan.
Notísia relevante: Semáforu modernu haat iha kapitál hahú funsiona
Jornalista: Arminda Fonseca
Editora: Maria Auxiliadora
