BOBONARU, 22 Dezembru 2025 (TATOLI)-Diresaun Transporte Terrestre (DNTT) delegasaun tertitoriál munisípiu Bobonaru halibur, husi fulan-Janeiru to’o 22 Dezembru 2025, reseita hamutuk $152.523 ba kofre Estadu.
Diretór DNTT Bobonaru, Tomás Maia, informa katak reseita hirak ne’e mai husi atividade inspesaun hamutuk $776.130, lisensa rihun $7-resin, rejistu veíkulu $25.152, renova karta kondusaun $83.325, no utiliza veíkulu pasa fronteira $815.
Notísia relevante: PNTL ho DNTT Bobonaro halo apreensaun ba motorizada 53
Tomás Maia adianta katak reseita iha tinan ne’e sa’e kompara ho tinan hirak liubá. “Ne’e tanba ita-nia komunidade sosa karreta no motór barak. Tempu agora ne’e transporte sai prioridade ba ema nia moris, ne’ebé hotu-hotu iha transporte para fásil liu atu halo serbisu, buka osan mós. Ne’e mak ita-nia númeru transporte ne’e sa’e maka’as loos. Tinan uluk kuaze inspesaun ne’e iha rihun 3 to’o 4, maibé agora sa’e ba rihun 5”, nia informa.
Daudaun ne’e, DNTT Bobonaru kontinua halo atendimentu normál tuir oras serbisu, nune’e iha posibilidade reseita sei aumenta.
Notísia relevante: DNTT Bobonaru rekolla reseita $46-resin ba kofre Estadu iha trimestre dahuluk
Jornalista: Sergio da Cruz
Editora: Maria Auxiliadora
