BOBONARU, 22 Dezembru 2025 (TATOLI) – Sítiu turístiku Bee-Manas Marobo, ne’ebé lokaliza iha suku Ilat-laun, postu administrativu Bobonaru, munisípiu Bobonaru, sai preokupante, tanba falta manutensaun dezde nia inaugurasaun iha loron 08 fulan-Dezembru 2016.
Rezidente sira husu ba Governu atu foti kedas pasu konkretu ida hodi reabilita fatin atrasaun turístiku ida-ne’e.
Romualdo de Jesus nu’udar reprezentante husi komunidade Soilesu afirma katak Bee-Manas Marobo iha poténsia nu’udar destinu turístiku prinsipál, liuliu hafoin Timor-Leste ofisialmente adere ba ASEAN. Nia fiar katak fatin ne’e bele atrai turista internasionál no kontribui ba retornu ekonomia ba Governu, partikularmente Governu lokál bainhira Bobonaru hakat ba poder lokál.
“Bee-manas Marobo inaugura iha tinan sia liubá ho orsamentu ne’ebé boot, maibé to’o ohin loron seidauk iha manutensaun. Pixina sira la di’ak hotu ona, no ambiente ne’ebé haleu ne’e la tau atensaun”, Romualdo lamenta ba Tatoli, iha sede suku Atuaben.
Nia esplika katak área Marobo la’ós de’it ho nia bee-manas, maibé iha mós fatin turístiku sira seluk hanesan Bee-Iis Borluli, Bee-Matan Sibi, Bee-Tudak, no Mota Blachu. Potensiál sira-ne’e hotu konsidera atrai turista doméstiku no internasionál sira bainhira jere ho di’ak.
Romualdo dehan bainhira turista sira vizita Marobo, indiretamente fó benefísiu ba nasaun, inklui liuhusi asesu ba aeroportu no setór apoiu sira seluk. Tanba ne’e, husu atu halo manutensaun no kuidadu ba fatin turístiku ne’ebé Governu investe ona.
“Agora kondisaun ladún furak. Ida-ne’e halo moe tebes ita, tanba la reflete imajen di’ak ida husi nasaun iha turista sira-nia matan”, nia hateten.
Antes ne’e, Romualdo dehan Governu estabelese ona Komisaun Jestaun Turizmu ne’ebé envolve rezidente lokál ho baze voluntáriu. Maibé, jestaun ida-ne’e la sustentavel no ikusmai abandona tiha.
Nune’e mós rezidente Marobo Bernadete de Jesus Soares husu ba Governu atu tau-matan ba infaestrutura bazíka Bee-Manas Marobo, tanba fatin ne’e hetan vizita beibeik husi abitante lokál no turista estranjeiru sira, liuliu iha tempu feriadu sira hanesan Natál no Tinan Foun.
“Nia kondisaun mak ladun furak, tanba uma-oan no harii fatin aat hotu ona, depois ai sira mós lahuk hotu ona”, Bernadete relata.
Komunidade espera Governu sei envolve rezidente lokál sira iha jestaun turizmu, nune’e Bee-Manas Marobo dala-ida tan bele sai destinu ne’ebé merese no orgullu ba Timor-Leste.
Bee-Manas Marobo ne’ebé lokaliza iha foho llat-laun hori uluk kedas rekoñese nu’udar fatin destinasaun turístika, nune’e Sekretaria Estadu Polítika Formasaun Profisionál no Empregu (SEFOPE), liuhusi projetu Turizmu Komunitáriu reabilita no moderniza ona infrastrutura bázika husi ninia orijinalidade.
Bee-manas Marobo reabilita iha tempu Sekretáriu Estadu Formasaun, Profesionál no Empregu Ilídio da Costa Ximenes, iha 2015, ho totál kustu $498.860 no inaugura iha loron 08 Dezembru 2016 husi Ministru Planeamentu no Investimentu Estratéjiku, Xanana Gusmão.
Notísia relevante: Komunidade Marobo husu reabilitasaun Bee-Manas hodi atrai turista
Jornalista: Sergio da Cruz
Editora: Maria Auxiliadora
