DILI, 22 Dezembru 2025 (TATOLI)—Governu aprova ona projetu Dekretu Governu kona-ba “Regulamentu ba aplikasaun kódigu aprovizionamentu no kontratu públiku” no mós “Vizaun jerál kona-ba enkuadramentu legál ba kontratasaun públika iha Timor-Leste”.
Proposta ne’e aprezenta husi Ministra Finansa, Santina Cardoso, iha reuniaun Konsellu Ministru ne’ebé hala’o iha Palásiu Governu, Dili, segunda (22 Dezembru 2025), ohin.
Bazeia ba dokumentu ne’ebé Agência Tatoli asesu iha portál Governu katak dokumentu sira-ne’ebé aprova tuir Dekretu Governu ida-ne’e elabora ho objetivu atu apoia funsionáriu públiku, jestór akizisaun no interveniente sira seluk
Nune’e iha prosesu kontratasaun públika, hodi fó ba sira orientasaun ida-ne’ebé klaru kona-ba implementasaun enkuadramentu jurídiku foun ne’ebé estabelese husi Dekretu-Lei nú. 1/2025, loron 08 fulan-Janeiru, ne’ebé aprova Kódigu Aprovizionamentu no Kontratu Públiku.
Enkuantu kona-ba regulamentu no vizaun jerál ne’e fó rezumu objetivu ida kona-ba dispozisaun prinsipál ne’ebé Kódigu foun introdús, hodi destaka ninia prinsípiu estruturante sira no fó detallu kona-ba métodu kontratasaun ne’ebé sei adota, hodi bele garante transparénsia, efisiénsia no preferénsia ba fornesedór nasionál sira iha selebrasaun kontratu públiku.
Dokumentu sira-ne’e sei disponivel iha Portál aprovizionamentu nian, iha lian ofisiál sira no ho tradusaun sira ba lian traballu nian, no aplika ba kontratu públiku akizisaun ka lokasaun (aluga) beins, akizisaun servisus ka ezekusaun obras nian, ho hanoin atu hatán ba nesesidade servisu no entidade sira-nian iha Setór Públiku Administrativu no dekretu Governu ida-ne’e tama iha vigór, iha loron 01 fulan-Janeiru tinan 2026.
Aleinde ne’e Konsellu Ministru mós aprova tan projetu Dekretu Governu, ne’ebé aprezenta mós hosi Ministra Finansa, kona-ba dokumentu padraun aprovizionamentu nian ne’ebé previstu iha Dekretu-Lei nú. 1/2025, loron 08 fulan-Janeiru, kona-ba kódigu aprovizionamentu no kontratu públiku.
Dekretu Governu ida-ne’e aprova nu’udar dokumentu padraun aprovizionamentu nian, ne’ebé organiza iha kategoria tolu ne’ebé keta-ketak, hanesan beins, servisu no obra, ne’ebé atu bele fasilita sira-nia aplikasaun tuir natureza husi kontratu públiku ne’e.
Formuláriu sira-ne’ebé presiza ba ezekusaun prosedimentu aprovizionamentu nian sei disponibiliza husi Ministériu Finansa iha portál aprovizionamentu.
Tanba ne’e, servisu no entidade setór públiku administrativu nian tenke rai sistema rejistu prosedimentu aprovizionamentu nian iha arkivu ba períodu mínimu tinan 10 hahú husi data rejistu nian no dekretu Governu ida-ne’e tama iha vigór, iha loron 01 fulan-Janeiru tinan 2026.
Jornalista : Alexandra da Costa
Editór : Cancio Ximenes
