DILI, 22 Dezembru 2025 (TATOLI)—Hospitál Nasionál Guido Valadares liuhusi Departamentu Banku de Sangue, kada fulan, apoiu raan hamutuk 700-resin ba pasiente sira-ne’ebé mak durante halo tratamentu iha Hospitál Nasionál Guido Valadares, Hospitál Referál Baukau no mós Maubisse.
“Fulan ida, raan ne’ebé mak ami oferese ba sala sira iha Ospitál laran ne’e ho Ospitál referál totál fulan ida-ne’e hamutuk 712 ne’e kada fulan hanesan ne’e. Barak tebes, ne’ebé hakarak ka lakohi, ita hotu tenke kontribui ba raan, tanba HNVG kada fulan husi 700 no ospitál referál sira hanesan Baukau nomós ospitál referál Maubisse. Tanba ida-ne’e depende ba sira-nia pedidu,” Xefe Departamentu Banku de Sangue iha Hospitál Nasionál Guido Valadares, Alexandrino Mendonça, hateten ba jornalista sira iha nia kna’ar fatin, ohin.
Nia espplika, estoke raan ba ohin iha Banku de Sangue HNGV totál hamutuk 113 kompostu husi tipu raan A, B, AB ho O.
“Tipu raan ne’ebé mak daudaun ne’e iha kompostu husi A hamutuk 47, B 14, AB 14 no O 37 no B Rhesus negatif (B-) ida totál 113 mak agora daudaun desponivel iha hela iha Banku de Sangue, ba loron ohin mak ida-ne’e espera katak maluk balun no voluntáriu balun bele mai halo tan doasaun raan,” nia dehan
Nia afirma, raan sira ne’ebé mak pasiente sira presiza barak-liu iha ospitál sira mak maiória tipu raan O.
“Raan sira-ne’ebé mak presiza barak ne’e, tuir dadus ne’ebé mak ami iha ne’e maioria tipu raan O positivu mak primeiru, segundu mak A pozitivu, terseiru mak B positivu no ikus mak AB pozitivu. Tuir dadus ne’ebé mak ami iha raan ne’ebé defisil liu atu hetan mak AB,” nia dehan.
Nia informa, raan AB pozitivu ne’e minimu liu depois ema sira ne’ebé mak tipu raan ida ema oituan.
“Depois susar tebes ita timoroan iha ne’e mak tipu raan negativu, tanba raan Banku de Sangue hetan ne’e depende ba ema mai fó, balun husi familia mak diretamente mak iha Banku de Sangue no balun mai husi voluntáriu sira-ne’e. Maibé voluntáriu sira ladún di’ak tanba kontínuasaun ne’e balun laiha,” nia informa.
Nia esplika, Kada fulan tolu no haat, Banku de Sangue sempre halo atividade doasaun raan ne’e iha grupu ida de’it mais grupu sira seluk kada tinan dala ida de’it.
“Grupu sira seluk ne’e kada tinan dala ida depende ba loron ne’ebé mak sira selebra ne’e. Tuir loloos, ita ema ne’e fulan tolu ba haat tenke fó raan mak balun la la’o tuir ida-ne’e,” nia esplika.
Tanba ne’e, Hospoitál Nasionál Guido Valadares liuhusi Banku de Sangue kontinua husu ba ema atu oferese raan ba pasiente sira-ne’ebé mak presiza raan.
“Ho nune’e mak ami kontínua apela ba komunidade atu kontinua apoiu raan ba pasiente sira-ne’ebé mak presiza raan, tanba raan ne’e so ita ema de’it,” nia dehan.
Jornalista : Felicidade Ximenes
Editór : Cancio Ximenes
