Modalidade tolu oferese medalla ualu ba Timor-Leste iha SEA Games
DILI, 22 Dezembru 2025 (TATOLI)–Modalidade desportu hamutuk tolu oferese medalla ualu ba Timor-Leste hafoin kompete iha desportu SEA Games ba da-33 iha Tailándia, foin lalais ne’e.
Modalidade tolu referida kompostu Taekwondo ho totál medalla rua ne’ebé oferese husi atleta na’in-tolu hanesan Merinda da Costa Soares, Dircia Cláudia Punef no Try Xena Dias ne’ebé kompete iha kategória ekipa Poomsae no Messias Mota iha kategoria kilógrama 87 hafoin hakat to’o meiu finál.
Notísia relevante: Atleta Elísio Raimundo Gaio sei kompete iha finál Boxe SEA Games
Aleinde ne’e, Modalide Boxe liuhusi atleta na’in-lima mós oferese medalla lima kompostu na’in-haat gaña medalla osan-metan hanesan Nicolao da Silva iha kategoria numéru 48, Titánia da Silva kategoria kilógrama 66, Alexandre Freitas kilógrama 69 no Gaspar da Costa Lobo kilógrama 75, enkuantu Elísio Gaio oferese osan-mutin hafoin derrota iha finál kategoria kilógrama 63,5.
Modalidade ikus ne’ebé kontijente Timor-Leste gaña maihusi modalidade E-Games klase feto kategoria mobile legand ne’ebé susesu rekolla medalla osan-metan.
Entretantu, modalide tolu seluk falla kompete iha kompetisaun desportu SEA Games iha Tailándia, tan ne’e la konsege rekolla medalla ba Timor-Leste mak hanesan Atletizmu, Karate-do no Futeból.
Jornalista: Natalino Belo
Editór: Xisto Freitas da Piedade
