VIKEKE, 22 Dezembru 2025 (TATOLI)–Xefe Sentru Saúde Vikeke Vila, Munisípiu Vikeke, João Corte Real hateten agora tempu udan susuk sai barak, nune’e alerta ba populasaun atu halo limpeza ambiente atu prevene moras dengue.
“Tempu agora rai udan ne’e susuk sei barak. Komunidade idak-idak tenke halo limpeza, soe lata mamuk sira, atu bee labele nalihun iha laran. Tanba ita haree ne’e, ita-nia komunidade seidauk konxiente soe lata mamuk. Ita atu prevene moras dengue ne’e presiza ita-nia ambiente moos hodi susuk labele tolun iha bee nalihun sira,” João Corte Real ba TATOLI,I.P iha Sentru Saúde Internamentu Vikeke, Vila, Segunda ne’e.
Notísia relevante: MS-OMS kapasita profisionál saúde sira kona-ba jestaun integrada moras dengue
João dehan, maski iha tinan 2025 Sentru Saúde Internamentu Vikeke Vila seiduak rejista kazu degue, maibé komunidade presiza tau-atensaun tanba tempu udan ne’e susuk nia tempu.
“Prevensaun ba moras dengue ami mós halo promosaun saúde ba kada suku sira no avizu ho karreta ba komunidade atu halo prevensaun ba moras dengue. Alende ne’e, ami mós distribui ai-moruk abate susuk nian ba ita-nia komunidade hodi tau ba bee laran. Ami kontinua esforsu ba prevensaun dengue atu labele afeta ba ita-nia komunidade,” nia haktuir.
João tenik daudaun ne’e ai-moruk abate iha Sentru Saúde Vikeke Vila sei sufisiente, nune’e solisita komunidade presiza hakbesik fasilidade saúde hodi foti ai-moruk ne’e.
Tuir dadus, Servisu Saúde Munisísipiu Vikeke seidauk rejista kazu dengue iha tinan 2025 nia laran. Más iha tinan 2024 rejista kazu dengue hamutuk 24 no na’in-ida (1) mate. Iha tinan 2023 rejistadu na’in-36 no tinan 2022 na’in-68.
Jornalista: Vitorino Lopes da Costa
Editór: Xisto Freistas da Piedade
