VIKEKE, 22 Dezembru 2025 (TATOLI)–Xefe Departamentu Dezenvolvimentu Parke Eskolár Munisípiu Vikeke, Lourenço Soares, informa rezultadu ezame nasioná ba tinan 2025 husi Munisípiu Vikeke, Ensinu Báziku Sentrál (EBC-sigla portugeza) iha estudante na’in-neen (6) reprovadu, enkuantu Ensinu Sekundáriu no Ensinu Sekundáriu Tékniku Vokasionál (ESTV) maioria aprovadu.
“Rezultadu ezame nasionál ba tinan ida-ne’e ita-nia estudante husi Ensinu Báziku na’in-neen reprovadu, maibé estudante husi Ensinu Sekundáriu no ESTV aprovadu 100%,” Lourenço Soares ba TATOLI,I.P iha Postu Vikeke Vila, Segunda ne’e.
Lourenço haktuir estudante sira-ne’ebé reprovadu ne’e tanba valór la to’o.
Notísia relevante: Eskola CAFE maioria sai mellór klasifikadu iha ezame nasionál, estudante la pasa hamutuk 1.118
“Nune’e, ba estudante sira-ne’ebé la pasa ne’e, sira sei iha oportunidade iha tinan oin, maibé depende filafali ba estudante sira-nia vontade,”, nia hato’o.
Nia relata estudante na’in-ne’en ne’ebé reprovadu ne’e kompostu husi EBC Lakluta na’in-haat (4) no EBC Iraler na’in-rua (2).
Entretantu, tuir dadus ezame nasionál ba tinan 2025 iha Munisípiu Vikeke, sentru ezame nasionál hamutuk 47, estudante husi EBC totál hamutuk 1.701, sekundáriu 1.271 no estudante husi ESTV 118.
Jornalista: Vitorino Lopes da Costa
Editór: Xisto Freitas da Piedade
