DILI, 22 Dezembru 2025 (TATOLI) – Ajénsia Notisioza Timor-Leste, Institutu Públiku (Tatoli I.P) asina akordu kooperasaun ho Sentru Komunikasaun Internasionál Guangxi (GXICC, sigla inglés), liuliu iha troka notísia, informasaun, no kapasitasaun mídia.
Akordu ne’e hala’o iha eskritóriu Tatoli, iha Faról, Dili, ne’ebé asina diretamente husi Prezidente Konsellu Diretivu Tatoli, Noémio Falcão, no Vise-Diretór GXICC, Ruo Rui, no sasin husi Sekretáriu Estadu Komunikasaun Sosiál, Expedito Dias Ximenes.
Noémio Falcão agradese ba GXICC ne’ebé vizita ona Timor-Leste no estabelese parseria ho Tatoli. Nia dehan Tatoli nu’udar mídia estatál no ho selebrasaun akordu ida-ne’e bele kesi liután parte rua iha futuru.
“Akordu ida-ne’e reprezenta kompromisu hamutuk atu fortalese kooperasaun iha área mídia no komunikasaun, liuliu iha área troka informasaun sira, dezenvolvimentu kapasitasaun profisionál no promosaun narrativa pozitiva sira ne’ebé parte rua ne’e hato’o ho pozitivu no kredivel”, dirijente ne’e hateten iha Faról, ohin.
Nia dehan Tatoli hanesan Ajénsia Notisioza Estadu no iha responsabilidade fornese informasaun ne’ebé loloos ba públiku no konfiavel.
Nune’e liuhusi asinatura akordu ne’e, parte rua sei serbisu hamutuk hodi aprende ba malu no fortalese ligasaun entre povu Timor-Leste no Xina, espesialmente ho GXICC.
Vise-Diretór GXICC, Ruo Rui, hateten kooperasaun ne’e foka liu ba partilla notísia no informasaun, programa interkámbiu, no kapasitasaun profisionál no formasaun ba jornalista no editór sira Tatoli nian.
Ruo Rui hateten GXICC komprometidu atu serbisu besik ho Tatoli hodi hasa’e kooperasaun iha mídia no komunikasaun.
Nia dehan nu’udar Ajénsia Notisioza Nasionál Timor-Leste nian, Tatoli hala’o knaar krusiál hodi habelar informasaun kona-ba nasaun ne’e nia poténsia ba mundu.
Rui destaka akordu ne’e importante tebes tanba Timor-Leste nia adezaun ba ASEAN ne’e hasa’e liután importánsia husi Tatoli nia knaar iha partilla informasaun rejionál no iha internasionál.
Tanba ne’e, GXICC prontu atu fó apoiu ba Tatoli liuhusi inisiativa kapasitasaun ho objetivu atu hasa’e kualidade produsaun notísia.
Iha biban ne’e, Ruo mós konvida Sekretáriu Estadu Komunikasaun Solisiál, Expedito Dias Ximenes, no Prezidente Noémio Falcão, atu vizita GXICC iha Provínsia Guangxi, Xina, hodi hametin liután kooperasaun mídia nian.
Sekretáriu Estadu Expedito Dias Ximenes hateten akordu one’e importante tebes no enkoraja GXICC atu promove Timor-Leste iha nivel internasionál, liuhusi troka notísia no informasaun ho Tatoli.
“Serbisu hamutuk ida-ne’e refelete esforsu oinsá ita habelar no haforte liután serbisu iha mídia nian. Ha’u hein katak kooperasaun ne’e bele implementa ho efetivu iha future”, nia hateten.
Nia akresenta katak kooperasaun sira hanesan ne’e labele sai de’it hanesan serimónia retórika, maibé implementa no husu GXICC bele sai promotór prinsipál ba Tatoli, tanba instituisaun ne’e iha nia kapasidade finanseira no rekursu umanu.
Sentru Komunikasaun Internasionál Guangxi maka inisiativa estratéjiku xinés ida ne’ebé nia baze iha súl Xina nian, ne’ebé serve hanesan sentru xave ida ba alkansa objetivu ba nasaun sira iha Sudeste Aziátiku.
Sentru ne’e foka ba mídia, troka kulturál, no envolvimentu diplomátiku, hodi aproveita fronteira sira Guangxi nian ho nasaun sira ASEAN nian.
Notísia relevante: Ajénsia Notisioza TATOLI no China Media Group asina akordu kooperasaun iha Xina
Jornalista: Arminda Fonseca
Editora: Maria Auxiliadora
