DILI, 23 Dezembru 2025 (TATOLI)—Embaixadór Japaun iha Timor-Leste, Tetsuya Kimura, tersa ne’e, despede Primeiru-Ministru, Kay Rala Xanana Gusmão, hafoin termina ninia misaun servisu durante tinan tolu iha Timor-Leste.
Embaixadór Japaun ba Timor-Leste, Tetsuya Kimura, hateten nia parte sei dezloka fali ba Japaun iha inísiu fulan-Janeiru 2026, tanba ne’e mai hato’o sentidu agradesementu sinseru ba Primeiru-Ministru nia apoiu no amizade durante tinan tolu iha Timor-Leste.
“Ha’u mós hato’o ha’u-nia apresiasaun ba Primeiru-Ministru ba nia lideransa hodi hametin relasaun bilaterál. Iha 2023, Primeiru-Ministru vizita Japaun no konkorda atu hametin ami-nia relasaun bilaterál sira ba parseria abranjente ida. Durante vizita ne’ebá, nia hasoru malu ho ami nia Primeiru-Ministru foun, Takaichi,” Embaixadór ne’e informa ba jornalista sira iha Palásiu Governu, ohin.
Diplomata ne’e dehan, ho ida ne’e mak Primeiru-Ministru Japaun kongratula diretamente ba Primeiru-Ministru Kay Rala Xanana Gusmão kona-ba Timor-Leste nia adezaun ba ASEAN.
Nia dehan, Prezidente da Repúblika Timor-Leste, José Ramos Horta, hala’o vizita ba Japaun iha okaziaun Expo Osaka–Kansai, nune’e mós sira-nia Vise-Ministru Parlamentár no Ministru Estadu Negósiu Estranjeiru nian vizita ona Timor-Leste kada tinan.
“Jeralmente, ami-nia relasaun bilaterál dezenvolve ona ho di’ak tebes. Maibé, ha’u mós hato’o ha’u-nia esperansa katak ita bele hametin liután ita-nia kooperasaun liuhusi interkámbiu sira iha nivel aas liután. Tanba Primeiru-Ministru afirma katak Japaun nu’udar parseiru ida-ne’ebé bele fiar tebes no reafirma nia konfiansa katak Japaun sei kontinua servisu besik ho Timor-Leste,” nia dehan.
Nia mós fornese atualizasaun sira kona-ba projetu kooperasaun importante sira, hanesan aeroportu internasionál no ospitál nasionál nomós projetu investimentu privadu rua iha konstrusaun ró no jerasaun enérjia solár.
Haree fila-fali ba tinan tolu liubá, nia fiar katak sira-nia kooperasaun no relasaun bilaterál dezenvolve ona ho signifikativu no nia hein ho laran tomak katak momentumpozitivu ida-ne’e sei kontinua iha futuru.
“Durante ha’u-nia mandatu, ha’u vizita munisípiu no área lokál barak, inklui liu suku 90 no envolve diretamente ho komunidade lokál sira. Timor-Leste nu’udar sosiedade ida-ne’ebé tradisionál tebes, no ha’u fiar katak ida-ne’e esensiál atu promove dezenvolvimentu rurál. Ami hein atu kria oportunidade barak liután ba jerasaun foun sira,” nia informa.
Entretantu, Japaun apoia agrikultór lokál no grupu feto sira liuhusi kooperasaun ho ONG lokál sira, ONG internasionál sira no ONG Japaun nian.
Tanba, nia dehan, ema millaun ida resin iha Timor-Leste hela iha área rurál sira, no nia hein katak progresu no dezenvolvimentu sei akontese iha komunidade nia leet.
Jornalista : Alexandra da Costa
Editór : Cancio Ximenes
