VIKEKE, 23 Dezembru 2025 (TATOLI)—Diresaun Territoriál Floresta Munisípiu Vikeke akompaña Floresta Nasionál entrega kilat-manu no mota-serra ne’ebé durante ne’e guarda floresta apreende ba Polísia Sientífika no Investigasaun Kriminál (PCIC-sigla portugeza) hodi kontinua prosesa ba Ministériu Públiku (MP).
Xefe Departamentu Floresta Nasionál, Apolinário Freitas, haktuir guarda floresta apreende sasán hirak-ne’e husi komunidade.
“Guarda floresta sira iha Vikeke halo apreensaun ba kilat-manu no mákina mota-serra, maibé ami menus koñesimentu kona-ba prosesu judisiáriu nian, tanba ne’e, sasán sira-ne’e ami asegura iha Departamentu Floresta. Ho ida-ne’e mak ami koopera hamutuk ho parte PCIC hodi entrega sasán sira-ne’e direta ba PCIC atu kontinua prosesa ba parte relevante,” Apolinário ba jornalista sira iha edifísiu SMAPPF, Vikeke, Tersa ne’e.
Notísia relevante: https://tatoli.tl/2024/06/25/guarda-floresta-halo-apreensaun-ba-kilat-manu-unidade-13-iha-viqueque/
Nia relata, sasán ne’ebé entrega ona ba PCIC ne’e kompotu husi kilat manu-rua no mota-serra hamutuk unidade neen (6).
“Atu tesi ai tenke rejistu maibé kuandu la rejistu mak ita-nia guarda sira hetan tenke apreende hodi prosesa bazeia ba regra sira-ne’ebé ita iha,” nia esplika.
Iha fatin hanesan, Xefe Investigasaun PCIC, Octavio Araújo hateten atividade ida-ne’e bazeia ba kooperasaun servisu ne’ebé parte Sekretaria Estadu Floresta no PCIC halo ona.
“Ami identifika objetu krime ne’e barak loos. Hahú apreende sasán kontra-bandu sira iha tinan 2004. Entaun, ami mai rekolla hotu sasán sira-ne’e hodi lori ba nasionál. Ami sei entrega ba Ministériu Públiku mak foti desizaun tanba sira mak na’in,” nia tenik.
Aleinde ne’e, Xefe Departamentu Floresta Vikeke, Júlio Ribeiro relata, antes ne’e, parte floresta entrega uluk ona kilat-manu hamutuk unidade 18 ba Diresaun Floresta Nasionál, kilat-manu unidade 13 mak entrega ba PNTL Vikeke, agora mak kontinua entrega kilat-manu rua no mota-serra neen (6).
Entretantu, partisipa iha serimónia entrega kilat-manu no mota-serra ne’e husi Diresaun Floresta Nasionál akompañadu husi Floresta Munisípiu Vikeke no ekipa PCIC.
Jornalista: Vitorino Lopes da Costa
Editór: Xisto Freitas da Piedade
