MI promete sei hadi’a serbisu PNTL iha tinan 2026
DILI, 23 Dezembru 2025 (TATOLI)–Ministériu Interiór (MI) promete sei hadi’a serbisu Polísia Nasionál Timor-Leste (PNTL) iha tinan 2026.
Ministru Interiór, Francisco da Costa Guterres hateten, nia parte apresia ho Polísia sira-nia serbisu durante ne’e maibé tinan 2026 sei hadi’a di’ak liután nune’e PNTL bele profisionál liután.
“Avaliasaun ohin ho PNTL ne’e atu entende didi’ak instituisaun nia kapasidade saida mak presiza aumenta, saida mak di’ak ita kontinua, saida mak ladi’ak ita hadi’a, rekursu umanu ka, ekipamentu ka kapasidade operasionál ka atetude ema-nia ka disiplina ita tenke haree hotu kedas atu nune’e dehan katak simu tinan 2026 ne’e ita komesa mellora hotu atu nune’e sira-nia serbisu iha terrenu ne’e di’ak atubele ajuda nasaun no Estadu ida-ne’e atu ajuda Governu hametin pás no estabilidade ita-nia komunidade bele moris hakmatek atubele hala’o sira-nia moris loroloron nian,” Ministru hato’o ba Jornalista sira hafoin partisipa avaliasaun anuál serbisu PNTL, ne’ebé hala’o iha Sentru Formasaun Polísia, Komoro, Tersa ne’e.
Notísia relevante : Komisaun Rekrutamentu fó sai rezultadu vaga PNTL iha Janeiru 2026
Nia dehan, Ministériu Interiór iha planu ba tinan oin atu kontinua foku hadi’a kapasidade operasionál instituisaun ne’ebé iha Ministériu nia okos, liliu PNTL, Imigrasaun, prevensaun konflitu inklui autoridade protesaun sivíl.
“Hadi’a di’ak liután sira-nia kapasidade ho saida ita tenke kria kondisaun ba sira. Ita kria ka tau ekipamentu, tau infrastrutura bázika, nune’e tau hotu nune’e para sira bele iha ona para sira ba halo sira-nia serbisu ne’e ho kbiit atubele responde situasaun ne’ebé mak ita-nia nasaun atravesa hela,” nia katak.
Ministru konsidera, avaliasaun instituisaun ne’e importante atu bele relata kona-ba saida mak atu halo iha tinan 2024 no 2025 nia laran, depois husu ba membru Polísia idakidak atu identifika sira-nia problema no dezafiu durante sira halo sira-nia serbisu.
Jornalista : Natalino Costa
Editora : Julia Chatarina
