BOBONARU, 23 Dezembru 2025 (TATOLI)-Polisia Nasionál Timor-leste (PNTL) munisípiu Bobonaru, liuhusi Seksaun Tránzitu Rodoviária rekolla durante tinan 2025 reseita hamutuk $65.186 hodi kontribui ba kofre Estadu.
Segundu Komandante Polísia munisípiu Bobonaru, Superintedente Asistente José Casemiro de Carvalho, dehan reseita hirak ne’e halibur husi infratór sira ne’ebé viola Lei Kódigu Estrada hanesan dokumentu transporte mate, karta kondusaun laiha no mate, asesóriu transporte laiha no seluk tan.
“Ita serbisu hamutuk ho DNTT hatama ona osan ba kofre Estadu $65.186, ne’e falta semana rua ba tinan ida-ne’e. Kompara ho tinan kotuk ita hatama de’it rihun $60”, nia informa hafoin halo retiru anuál 2025 ho komandante seksaun, eskuadra no membru sira iha Kuartél Komandu Polísia munisípiu Bobonaru, ohin.
Adjuntu Komandante PNTL munisípiu Bobonaru ne’e relembra katak, iha loron 16 to’o 19 fulan ne’e, Seksaun Tranzitu Rodoviária mós hala’o auto-stop ba transporte públiku no privada hodi hare utente rodoviáriu ne’ebé kontra Lei Kodigu Estrada. Atividade ne’e halo apreensaun ba morizada 99 no karreta tolu. Aleinde ne’e, ho prezensa autoridade seguransa ne’e mós evita estudante finalista tinan letivu 2025 hala’o koboiu iha kapitál Maliana.
“Horisehik no ohin ita halo atendimentu ba sidadaun sira ne’ebé uza kaereta no motór mai kumpre ona sira-nia violasaun ne’ebé komete. Sira selu ona iha banku depois mak foti sira-nia transporte”, dehan,
Atu prevene no minimiza risku ba sidadaun sira maka PNTL kontinua halo auto-stop, tanba dadus asidente tráfegu 2025 ne’ebé rejista hamutuk 84, husi numeru ne’e na’in-ualu lakon vida.
“Liuhusi auto-stop atu informa ba sidadaun sira bainhira iha viajen nia-laran respeita regra, uza kapasete ne’ebé seguru hodi asegura ita-nia vida”, nia aviza.
Biban ne’e, nia sujere ba motorista no kondutór sira atu renova dokumentu sira ne’ebé kaduka, tanba viola regra maka bele selu infrasaun to’o montante ne’ebé boot.
Notísia relevante: PNTL Bobonaru aprezenta kazu 263 ba MP, maioria krime kontrabandu
Jornalista: Sergio da Cruz
Editora: Maria Auxiliadora
