KOVALIMA, 23 Dezembru 2025 (TATOLI)-Xefe Sentru Saúde Postu Fatumea, munisípiu Kovalima, Verónica de Jesus Cardoso, husu ba Servisu Saúde munisipál atu koloka médiku sia bá postu saúde hodi fó tratamentu ba pasiente sira.
“Ami daudaun ne’e enfrenta problema menus rekursu hanesan postu saúde rua laiha médiku atu halo atendementu ba komunidade tanba koloka de’it médiku na’in-ida iha sentru Saúde Komunitária,” nia hateten ba jornalista sira iha resintu autoridade munisípiu Kovalima, ohin.
Nia dehan, durante ne’e enfermeiru no parteira sira maka asume mós kna’ar nu’udar médiku nian hodi konsulta no halo tratamentu ba pasiente sira iha postu saúde Nanu no Alastehen.
Postu saúde Nanu iha enfermeiru na’in ida no parteira ida, enkuantu Postu Saúde Alastehen iha de’it enfermeiru na’in rua no laiha parteira no médiku hodi koloka iha fatin rua ne’ebá. No Sentru Saúde Komunitária Fatumea maka iha médiku na’in-ida, maibé daudaun ne’e nia kondisaun saúde la permite atu halo servisu.
Iha fatin hanesan Xefe Sentru Saúde Tilomar, Carlito Sebastião Belo,reforsa Sentru Saúde Komunitária Tilomar mós daudaun ne’e sei kontinua enfrenta problema menus rekursu umanu.
“Durante ne’e ami menus rekursu liuliu médiku ne’ebé iha postu saúde wetaba,Lalaua no Foho Lulik laiha médiku,tanba médiku la sufisente nune’e enfermeiru no parteira sira maka halo atendementu,”nia hateten.
Hatan ba problema ne’e, Diretór Servisu Munisipál Saúde Kovalima, Domingos Sequeira, rekoñese postu sira balun sei menus rekursu hanesan médiku.
“Ita loke ona vaga atu halo rekrutamentu ba médiku hanesan iha Kovalima presiza na’in 13 ne’ebé rekomenda hosi Ministériu Saúde ( MS) inklui rekruta médiku na’in-haat hafoin maka ita rona rezultadu husi prosesu rekrutamentu,”nia esplika.
Servisu Saúde Munisípiu Kovalima, iha sentru Saúde Komunitária kompostu husi Sentru Saúde Komunitária Fatumea, Fatululik,Fohorem,Tilomar,Suai,Maukatar no Zumalai inklui iha Postu Saúde 25.
Tuir dadus funsionáriu ne’ebé presta servisu iha Autoridade Munisipàl Saúde, Kovalima hamutuk 350, kompostu husi permanente 173 no kontratadu 177.
Jornalista:Celestina Teles
Editór:Florencio Miranda Ximenes
