S’amuser FC lolo AD SLB 3-1, Buibere manán Na’in-Feto 15-0
DILI, 23 Dezembru 2025 (TATOLI)—Ekipa futeból femininu S’amuser Football Club lolo AD SLB ho skor 3-1, enkuantu Buibere manán Na’in-Feto ho skor boot 15-0 iha jornada dasiak primeira divizaun Liga Futeból Femininu Timor-Leste (LFFTL) ne’ebé realiza iha loron Domingu (21/12/2025).
S’amuser FC ne’ebé rezultadu jornada daualu liu pontu rua (2) husi AD SLB, hala’o jogu ho agresivu nune’e rezulta lidera uluk liuhusi jogadora Ruth Lawari iha minutu sia (9) no Godelivia Martins iha minutu 12, mezmu AD SLB hamihis skor iha minutu 17 liuhusi golu Maria Conceição maibé jogadora S’amuser Dolores Costa hadook tabela skor 3-1 iha parte dahuluk iha minutu 37.
Enkuantu, ekipa Buibere FC ne’ebé kontra Na’in-Feto livremente enxe golu hodi rezulta tabela skor 15-0 ne’ebé iha parte dahuluk prodús husi jogadora sira hanesan on goal Ezra Martins minutu sia (9), Epifânia da Costa minutu 10, 11, 12 no 38 no Natércia Pereira iha minutu 41.
Notísia relevante: VDL sofre golu 0-11 husi S’amuser FC
Iha parte daruak, Buibere FC kontinua prodús golu liuhusi jogadora sira hanesan Epifânia da Costa minutu 69, Natércia Pereira minutu 72, Merícia Barbosa minutu 65, 90+1, Deonísia Silva minutu 75, 89, Develita da Silva minutu 77 no Deonísia Guimarães iha minutu 88.
Ho rezultadu jogu rua referida rezulta, S’amuser FC lidera tabela klasifikasaun ho pontu 25 hafoin manán ualu (8), impata ida (1), enkuantu Buibere iha pozisaun daruak ho pontu 22, rezultadu manán hitu (7), derrota ida (1) no impata ida (1).
Entretantu, AD SLB okupa iha pozisaun datoluk ho pontu 20, rezultadu manán hitu (7), derrota ida (1) no impata ida (1), enkuantu Na’in-Feto FC iha pozisaun daualu (8) ho pontu haat (4), hafoin manán ida (1), impata ida (1) no derrota hitu (7).
Jornalista: Natalino Belo
Editór: Xisto Freitas da Piedade
