DILI, 23 Dezembru 2025 (TATOLI)—Servisu Nasionál Emerjénsia Ambulánsia no Médikamentu, durante semana ida-nia laran, halo atendimentu ba benifisiariu veteranu rejistadu tinan 2009 hamutuk 107 maiória idade avansadu.
“Ita halo atendimentu hahú husi 15 to’o 22 Dezembru horisehik, ita kontínua to’o pagamentu ne’e hotu, totál ita-nia veteranu no veterana sira-ne’ebé mak hetan intervensaun husi médiku husi pesoál emerjénsia SNAEM hamutuk 107. Pasiente sira-ne’e maiória ho idade ne’ebé mak tinan 50 ba leten,” Diretór Servisu Nasionál Ne’e Ambulánsia no Médikamentu, Simplicio Amaral, hateten ba jornalista sira iha nia kna’ar fatin, ohin.
Nia hateten, Servisu Nasionál Ambulánsia Emerjénsia no Médikamentu iha loron 15 Dezembru ne’e haruka de’it ambulánsia rua de’it, maibé haree kondisaun saúde veteranu ladún di’ak entaun monta tan postu saúde iha edifisu Ministériu Asuntu Kombatente Libertasaun Nasionál.
“Ita haree, ita-nia veteranu sira ho kondisaun saúde ne’ebé mak lafavoravel, purtantu ami deside monta fali postu médiku ida iha ne’ebá atu nune’e ita bele atende di’ak liután ba ita-nia veteranu sira. Tanba ne’e mak atendimentu husi SNAEM nia iha edifisu ne’ebá komesa hahú husi dia 15 Dezembru,” nia dehan.
Nia relata, husi na’in 107 ne’e halo evakuasaun uitoan de’it, até agora Servisu Nasionál Ambulánsia Emerjénsia no Médikamentu halo de’it evakuasaun na’in-rua ba Hospitál Nasionál Guido Valadares.
“Restu ne’e, ita evakua ba iha sentru saúde Komoro. Maiória sira ho moras trauma balun kanek, tanba dudu malu iha ne’eba. Purtantu, moru ne’ebé mak ita-nia funsionáriu sira halo iha moru ne’e monu, sira balun isin kanek no balun besi mak monu ba sira-nia leten, balun tuda malu ho kadeira, entaun ida ne’e mak halo trauma ba sira. Komu ita-nia veteranu sira mós idade avansadu hotu entaun fasil atu hetan dezisaun ba sira-nia isin, tanba ne’e mak até horisehik iha 22 Dezembru ne’e, ita atende hamutuk 107,” nia infoma.
Nia esplika, sira-ne’e halo de’it atendementu ne’ebé mak SNAEM instala ona iha areadór MAKLN.
“Ita instala de’it tenda ida iha ne’ebá mais ho medida ne’ebé mak boot tanba ita mós iha ita-nia kama observasaun tolu ho mós ekipamentu médiku maizumenus bele atende kualker situasaun emerjénsia. Karik sira-ne’e mak presiza intervensaun mais avansadu, ita bele haruka ba sentru saúde ou ba iha HNGV mais até agora na’in-rua de’it mak transfere ba,” nia dehan.
Nia informa, sira na’in-rua (2) ne’ebé mak halo evakua ba Hospitál Nasionál Guido Valadares ne’e balun ho moras ne’ebé mak komplikadu.
“Sira-ne’ebé mak mai ho tratamentu ezemplu moras TBC balun ho iis boot ne’ebé mak makaas entaun ita-nia ekipa sira haruka ba iha HNGV hodi simu tratamentu di’ak uitoan, liuliu ba sira-ne’ebé mak sofre ona moras hanesan OPD ne’e moras krónika uitoan ne’ebé mak afeta ba ita-nia pulmaun entaun presiza ba iha HNGV,” nia dehan.
Jornalista : Felicidade Ximenes
Editór : Cancio Ximenes
