BOBONARU, 24 Dezembru 2025 (TATOLI) – Bispu Dioseze Maliana, Don Norberto do Amaral, iha misa kalan Natál hateten Jezús Kristu nia moris nu’udar sinál tanjivel Maromak nia domin boot ba umanidade.
Iha omília, Bispu Norberto dehan Jezús moris mai iha mundu, nu’udar naroman ne’ebé halakan ema nia moris no orienta ema ba dalan loos.
Nia salienta Maromak fó kbiit ba Jezús atu halibur ema hotu-hotu atu moris hamutuk ho nia nu’udar família ida de’it iha Maromak nia domin.
“Maromak hadomi tebes umanidade. Jezús mai atu korrije sala, gia ita atu tuir buat di’ak, no lori ita ba moris rohan-laek nu’udar família ida de’it iha Maromak nia fuan”, Bispu Maliana hato’o.
Nia esplika katak Jezús mak naroman mundu nian ne’ebé lori ksolok no dame, liuliu ba sira ne’ebé simples, haraik-an no terus-na’in.
Jezús nia prezensa hatudu katak Maromak loke nia fuan ba ema hotu lahó esesaun no mai atu buka no halibur sira ne’ebé lakon.
Don Norberto mós konvida sarani sira atu loke neon hodi simu Jezús nia prezensa iha sira-nia moris loron-loron.
Nia fiar katak okupadu no egoízmu dalabarak sátan ema atu harii relasaun neʼebé besik ho Maromak.
“Importante ba ita atu loke ita-nia fuan, tanba Jezús mai hodi lori naroman no ksolok ba ita idaidak. Nia la’o hamutuk ho ita no akompaña ita iha ita-nia moris loroloron”, hatutan.
Bispu subliña katak Jezús Kristu ne’ebé moris hias sei fila ho kbiit boot. Tanba ne’e, nia konvida sarani sira atu kontinua moris tuir Maromak nia hakarak no atu halo Natál sai momentu ba fiar no domin ne’ebé hafoun iha ema nia moris.
Notísia relevante: Natál nu’udar tempu renovasaun moris nian
Jornalista: Sergio da Cruz
Editora: Maria Auxiliadora
