DILI, 24 Dezembru 2025 (TATOLI)—Diretór Servisu Edukasaun Munisípiu Likisá, Júlio da Silva, hateten rezultadu ezame nasionál 2025 husi Munisípiu Likisá, estudante ensinu báziku, ensinu sekundáriu jerál no ensinu sekundáriu tékniku vokasionál hamutuk 94 mak reprovadu.
Dirijente ne’e dehan parte edukasaun munisipál lahatene kauza husi estudante hirak-ne’e la pasa, maibé ida-ne’e responsavel eskola sira tenke-tau atensaun.
“Estudante ne’e presiza preparadu iha matéria hotu-hotu, presiza lee barak, maibé inan-aman mós tenke hanorin sira iha uma,” nia dehan ba TATOLI via telefónika, Kuarta ne’e.
Notísia relevante: Rezultadu ezame nasionál 2025, estudante EBC Vikeke neen reprovadu
Nia espera diretór eskola sira tenke uza nia mekanizmu ne’ebé di’ak hodi hanorin estudante sira, nune’e tinan oin labele akontese tan estudante ne’ebé reprovadu.
“Ita-nia estudante ne’ebé tuir ezame nasionál husi ensinu báziku hamutuk 1.531, mane iha 706 no feto iha 825. Sira-ne’ebé pasa hamutuk 1.441 no reprovadu 78 no auzente iha na’in-12. Agora ba estudante ensinu sekundáriu hamutuk 1.251, sira-ne’ebé pasa iha 1.220 no reprovadu iha 16 no mós auzente iha na’in 15,” nia relata.
Júlio da Silva hatutan ba ensinu sekundáriu tékniku vokasionál estudante hamutuk 187, kompostu estudante ne’ebé pasa 171, reprovadu jero (0), auzente iha na’in 16. Enkuantu, Edukasaun Munisípiu Likisá seidauk iha eskola ekivalénsia.
Jornalista: Osória Marques
Editór: Xisto Freitas da Piedade
