Departementu tolu iha HNGV muda ona ba Hospitál António Carvalho Lahane
DILI, 29 Dezembru 2025 (TATOLI)—Departamentu tolu iha Hospitál Nasionál Guido Valadares muda ona ba Hospitál António Carvalho Lahane, nune’e bele mimimiza over load kada loron iha Hospitál Nasionál Guido Valadares.
“HNGV daudaun ne’e utiliza ona ospitál António Carvalho Lahane tanba hetan autorizasaun husi Ministériu Saúde. Departamentu tolu mak muda tiha ona ba leten, primeiru departamentu visiu terapia, segundu departementu moras Infeksaun sentru izolamentu hanesan pasiente sira sofre infeksaun iha pulmaun ka Tuberkuloze no terseiru mak departamentu rekursu umanu,” Vidal de Jesus dehan ba Jornalista sira iha nia kna’ar fatin, Bidau Tokoh Baru, ohin.
Kona-ba pasiente, nia informa, agora daudaun ne’e totál hamutuk 46 mak halo hela tratamentu iha Hospitál António Carvalho Lahane.
“Daudaun ne’e pasiente hamutuk na’in-46 mak mak halo hela tratamentu iha ospitál leten, maibé kona-ba profisionál mak ha’u la lembra, departamentu banhira muda hotu ba leten hanesan infermeiru, tékniku aliadu, kliner, siguransa ne’e pakote ida-ne’e ba hotu leten, ida uluk iha ne’e muda hotu ona ba leten,” nia dehan.
Nia esplika, tanba over load iha Hospitál Nasionál Guido Valadares mak tenta muda ba Lahane atu espasu iha Hospitál Nasionál Guido Valadares mamuk nune’e bele minimiza over load iha ne’e.
“Ita muda ba Lahane hodi fó espasu ba iha ne’e, atu bele ense fali bainhira akontese over load ita bele fo baixa pasiente. Ida-ne’e ita bele minimiza ona over load, tanba pasiente barak demais. Tanba muda ona ba leten, espasu iha ne’e mamuk, signifika bainira iha ne’e nakonu ita bele ense fali fatin sira-ne’ebé mak mamuk ne’e,” nia informa.
Nia esplika ba oin atu muda tan departamentu seluk ne’e depende ba planu husi Hospitál Nasionál Guido Valadares, tanba daudaun ne’e edifisu andar lima iha Hospitál Nasionál Guido Valadares mós la’o hela karik ba oin iha departamentu balun atu bele muda tan maibé depende.
” Depende master plan, master plan banhira afeta ba departamentu ida-ne’ebé ita tenke buka tentativa,. Agora edifisu andar lima la’o ona andar haat tuir mai, agora tuir mai fali ne’e atu kona-ba ida-ne’ebé, banhira kona fali ba konsulta externa, entaun ita tenke muda fali konsulta externa ne’ebé servisu boot ida la fasil. Agora ita buka fatin mós la loos fasil, kuandu Lahane nakonu ita tenke buka fali alternativa seluk,” nia esplika.
Kona ba espasu iha Hospitál António Carvalho Lahane dau,daun ne’e sei sufisiente karik tempu badak haree ba kondisaun rekursu umanu iha entremu forsa tarballu no ekipamentu.
Jornalista : Felicidade Ximenes
Editór : Cancio Ximenes
