BOBONARU, 29 Dezembru 2025 (TATOLI) – Bispu Dioseze Maliana, Don Norberto do Amaral, enserra Tinan Jubileu Esperansa 2025 ho prosisaun husi Kámara Ekleziástika to’o igreja Pró-Katedrál Maliana no ho selebrasaun litúrjika solene.
Enserramentu ne’e marka rohan ba tinan ida ho balun viajen espirituál sarani katólika sira-nian iha Dioseze Maliana, ne’ebé partisipa husi relijiozu no sarani sira.
Iha omília, Bispu Norberto subliña katak durante Tinan Jubileu Esperansa, Kreda hanoin no hamoris mensajen xave tolu: Komuñaun, Partisipasaun, no Misaun.
“Komuñaun katak ita moris hamutuk nu’udar povu ida de’it iha fiar ida de’it, estrutura sagrada ida de’it, no hanorin apostóliku ida de’it, nune’e ita bele buras nu’udar Igreja Katólika ne’ebé moris no fiél”, Don Norberto esplika.
Kona-ba partisipasaun ezije ema hotu nia envolvimentu ativu iha Kreda nia moris no hala’o sira-nia obrigasaun loroloron nian. Liuhusi partisipasaun ida-ne’e hein katak sarani sira bele hamutuk harii Kreda no sosiedade.
Bispu afirma partisipasaun tenke lori ba misaun, katak haklaken Jezús Kristu nia santidade ba sira ne’ebé seidauk koñese Nia ka hili atu la koñese Nia.
“Kristu mai iha mundu hodi fó esperansa ba ita hotu. Rikeza loloos husi moris ne’e mak halo di’ak ba ema seluk, orienta malu, no moris tuir Maromak nia hakarak iha espíritu solidariedade nian”. dehan.
Nia mós konvida kongregasaun atu agradese ba Maromak nia grasa durante Tinan Jubileu, bainhira ema barak mai halo peregrinasaun no husu perdaun ba sira-nia sala.
Taka Odamatan Jubileu nian simboliza kompromisu foun atu moris nu’udar sarani di’ak iha sira-nia moris loroloron.
Notísia relevante: Tinan Jubileu hametin fiar no esperansa sarani nian
Vigáriu Jerál Dioseze Maliana, Padre Lúcio Norberto de Deus, hateten enserramentu Jubileu Esperansa ne’e akontese iha ambiente Natál nia leet, hodi hakle’an liután sentidu fiar no esperansa nian iha kongregasaun nia leet.
“Ita hein katak liuhusi selebrasaun Tinan Jubileu Esperansa ida-ne’e, fiar no esperansa sarani sira-nian iha Dioseze Maliana sei hametin liután”, nia realsa.
Tuir Bispu, enserramentu Tinan Jubileu Esperansa 2025 hein atu sai momentu ida ba komunidade Katólika Dioseze Maliana nian atu kontinua la’o hamutuk iha konfraternidade, partisipasaun ativa, no sentidu misaun iha Kreda no sosiedade nia moris.
Notísia relevante: Peregrinasaun tinan Jubileu 2025 sai momentu moris iha grasa Maromak nian
Jornalista: Sergio da Cruz
Editora: Maria Auxiliadora
