DILI, 12 Marsu 2025 (TATOLI)- Timor-Leste nu’udar nasaun demokrátiku ne’ebé populasaun maioria moris ho relijiaun Katólika – besik 96% tuir dadus estatístiku, tanba ne’e, iha kada tinan sarani Katólika liuhusi misaun igreja sempre realiza atividade Jubileu hodi hametin fiar sarani nian atu manan induljénsia plenária, nune’e iha anu Jubileu ida-ne’e nia tema mak “La’o hamutuk iha dalan ba esperansa”.
Atividade Jubileu, hanesan ne’e mós sempre halo kooperasaun ho irarkia igreja Katólika ba tinan tomak ne’ebé akontese iha arkiodioseze nian Dili laran ne’ebé liuhusi kompeténsia Amu Kardiál.
“Misaun prinsipál anu Jubileu halo kolaborasaun, primeiru mak kooperasaun ho vigáriu Episkopál Pastorál, ne’e para haree programa tinan tomak ne’ebé akontese iha arkiodioseze Dili nian”, Diretór Komisaun Juventude Katólika ArkioDioseze Dili (COJUCAD), Pe. Cirilio dos Santos Maia, ba jornalista TATOLI iha sentru formasaun COJUCAD, ohin.
Daudaun ne’e mós liuhusi kompeténsia Amu Kardiál fó sai ona ba arkiodioseze Dili, kona-ba fatin espiritualidade sira ne’ebé atu manan induljénsia plenária ba anu Jubileu tinan ida-ne’e mak, Katedrál, RAEOA, Ataúru, Ramelau, Fatubesi; ne’e sai konkordansia hili moris ida atu halo jornada esperansa ne’e.
“Entaun arkiodioseza Dili, liuhusi mahan, liu kompeténsia Amu Kardiál, ne’ebé fó sai ona iha Arkidioseze Dili ba fatin sira ne’ebé atu manán induljénsia plenária liuliu iha anu esperansa, primeiru katedrál, ne’ebé sai hanesan fatin prioridade espirituál, tuir mai mak Oe-Cusse, Ataúro, Ramelau no Fatubesi”, Pe. Cirilio hateten.
Kona-ba destinasaun hirak ne’e mós depende ba konkordánsia husi parókia nian, ne’ebé atu delega nia sarani sira ba hasa’e orasaun hodi manan induljénsia plenária iha anu Jubileu ida-ne’e.
“La’e ne’e konforme parókia ida-idak ninia programa, parókia nia konkordánsia ho sarani sira dehan katak, ita tinan ne’e ita-nia parókia halo peregrinasaun ba fatin santu sira”, nia hateten.
Enkuantu iha anu Jubileu tinan-2025 ne’e kontempla nafatin ba esperansa ne’ebé la bosok, katak Maromak de’it mak hanesan esperansa ne’ebé labosok, tanba Maromak mak halo nia aliansa ho povu no ema halo promosa liuhusi kardiál sira.
“Programa anu Jubileu nian ne’e kontempla nafatin ba esperansa ne’ebé labosok, ne’ebé reprezentativu husi Roma, ne’e koalia kona-ba esperansa ne’ebé labosok ne’e Maromak de’it, Maromak halo ninia aliansa ho ninia povu, ema halo nia promesa liuhusi kardiál sira”, nia dehan.
Enkuantu Diretór COJUCAD ne’e mós husu sarani sira obrigatóriu iha tempu kuarezma iha anu Jubileu ne’e maka hatudu ninia signifikadu ba sarani sira atu kumprende kona-ba orasaun, abstinénsia no esmola tanba buat sira ne’e hotu iha igreja hanorin ona. Nune mós husu ba sarani sira atu badinas ba missa, sarani sira nafatin iha amizade ho ninia parókia rasik.
Jornalista: Alexandra da Costa
Editór: Rafael Ximenes de A. Belo
