KOVALIMA, 29 Dezembru 2025 (TATOLI)- Ministra Solidariedade Sosiál no Inkluzaun (MSSI), Verónica das Dores, hamutuk ho Vise Ministra MSSI, Reprezentante Ministru Justisa, akompaña ho Autoridade Kovalima selebra Natal hamutuk no hodi husu ba prezu sira iha prizaun Suai atu hamtauk no fó domin ba nia maluk sira.
Atividade Natal hamutuk ne’e ho nia Tema maka “Liuhosi Natal no Tinan Foun ita hotu bele halo reflesaun ba valor espíritu domin, pás, justisa no prosperidade.
“Ha’u bele ko’alia liafuan esensiál rua ba ita boot maka hanesan hamtauk. Hamtauk la’os Maromak de’it, maibé ha’u tauk atu halo no tauk atu sala. Ha’u hanoin prizaun hotu sai uma domin la presiza ita bolu prizoneiru. Fatin ne’e ka prizaun ne’e uma ba domin no pás”, Ministra Verónica hato’o liuhusi nia diskursu iha estabelisementu Prizaun Suai, ohin.
Pontu esensiál ba daruak ne’ebé Governante ne’e partilla maka domin, bainhira iha hamtauk presiza domin. Domin maka presiza respeita malu tanba prezu sira ne’ebé maka iha estabelesementu prizaun Suai ho nia tipu kazu ne’ebé maka la hanesan.
“ Ha’u husu ita boot sira atu halo orasaun, molok toba husu ba Maromak atu muda ha’u nia karater no presiza atu halo reflesaun ba hahalok pasadu sira iha prizaun”, nia fó hanoin.
Durante prezensa Ministra MSSI ho Vise-Ministra MSSI ,Reprezentante Ministru Justisa sira mós halo vizita hodi haree direta kondisaun prezu sira iha estabelesementu prizaun Suai kada bloku hanesan A,B no C.
Tuir dadus totál prezu sira ne’ebé daudaun iha estabelesementu prizaun Suai hamutuk 121 ne’ebé fahe ba bloku A,B no C.
Entertantu, Reprezentanta Ministru Justisa, Honório Aureliano Soares Magalhães, agradese ba Ministra Solidariedade Sosiál no Inkluzaun ho Vise hamutuk hala’o atividade Natal hamutuk ba datoluk iha estabelesementu prizaun Suai
“Atividade Natal hamutuk antes ne’e ita hala’o ona iha prizaun Gleno, Becora no ohin ita hala’o iha prizaun Suai hodi kontente hamutuk ho prezu sira. Ho Natal tinan foun ita loke ita nia neon ho laran hodi halo reflesaun ba hahalok ne’ebé maka pasadu ita komete no ba oin sai ema di’ak hodi seve familia, sosiedade no nasaun”, nia dehan.
Prezu sira hetan formasaun
Diretór Estabelesimentu Prizaun Suai, Rui Gonçalves, introdús atividade prezu maka hanesan, prodús tizolu, karpitária, soldadura, alfaiatE, homan kova, ortikultura foku ba kuda modo no formasaun dalén inglés.
“Ema barak hanoin katak guarda prizaun nia servisu maka loke taka de’it odamatan, maibé ami mós hala’o servisu prepara prezu-sira hodi hala’o atividade prinsipál hodi prepara prezu sira ho atividade prinsipál hitu ”, Diretór ne’e relata.
Formasaun dalén inglés ba prezu sira ne’ebé fasilita husi guarda prizaun ho naran Reinaldo Barreto ne’ebé maka lisensiadu Inglés, ho gratuita tanba guarda prizaun nia lisensiatura Inglés.
Atividade ne’ebé maka guarda prizaun hala’o iha prizaun hanesan parte ida prepara prezu sira, nune’e iha tempu bainhira prezu sira re-integra ba família no sosiedade bele fó benefisiu ba prezu sira aleinde mós kontinua partilla informasaun kona-ba iha prizaun nune’e bele redús ema mai iha prizaun.
Jornalista:Celestina Teles
Editór:Florencio Miranda Ximenes
