PNTL sei halo apreensaun ba karreta Estadu ne’ebé halo movimentu iha loron boot

DILI, 29 Dezembru 2025 (TATOLI)—Polísia Nasionál Timor-Leste (PNTL) sei halo apreensaun ba karreta Estadu ne’ebé halo movimentu hodi tula família ba paseu iha ámbitu loron boot.

Komandante PNTL Munisípiu Dili Superintendente Xefe Polísia Orlando Gomes, hateten, Rezolusaun Governu nian ba operasaun karreta Estadu iha fimdesemana no loron kontinua válidu. Tanba ne’e to’o agora Ekipa Konjunta PNTL, Komisaun Funsaun Públika, Provedoria Direitu Umanu no Justisa (PDHJ), Patrimóniu Estadu Inklui Komisaun Antí-Korrupsaun (CAC) kontinua kumpre ba rezolusaun ne’e.

“Operasaun kona-ba karreta Estadu la’o nafatin, ita hatene katak iha loron feriadu ne’e labele utiliza karreta Estadu tula família sira bá pasiar,” Komandante Orlando hato’o  ba jornalista sira iha Sentru Konvensaun Dili (CCD, sigla portugés) Segunda ne’e.

Notísia relevante : Instituisaun haat reativa pasa revista karreta Estadu  

Nia dehan, iha selebrasaun Natál no Tinan Foun ne’e ekipa konjunta Tránzitu, Patrimóniu Estadu, no CAC sei hamutuk atu monitoriza nafatin karreta Estadu ne’ebé maka halo movimentu iha momentu feriadu.

“Kuandu ita hetan ita halo apreensaun no ita prosesa hanesan bai bain,” nia katak.

Jornalista     : Natalino Costa

Editora          : Julia Chatarina