BOBONARU, 29 Dezembru 2025 (TATOLI) – Públiku preokupa ho ponte iha área Galusapulu, suku Lahomea, postu administrativu Maliana, munisípiu Bobonar, tanba besik atu kotu.
Preokupasaun komunidade nian ne’e tanba ponte ne’e nu’udar pontu asesu prinsipál abitante sira iha postu Maliana no Loloto’e nian, ne’ebé oras fó perigu ba utilizadór estrada sira, liuliu ba motorista sira.
Rezidente Galusapulu Florindo de Jesus Soares haktuir katak kada tinan ponte ne’e sempre hetan estragu, maibé fulan balun liubá, IGEADI hadi’a no halo instalasaun ba gabiaun sira hodi fasilita pasajen veíkulu nian.
Notísia relevante: Komunidade hein intervensaun Governu hadi’a estrada Maliana-Bobonaru
“Hafoin udan, rai iha ponte nia okos monu tun hotu ba mota laran. Dalan kloot tebes, hela deit ba karreta ida nia, ita hasoru malu la di’ak, atu liu tenke hein malu, depois rai mós atu monu hotu ona, ita ta’uk fali”, nia relata ba Tatoli, ohin.
Tuir nia, bainhira Governu la buka solusaun, ponte ne’e bele kotu totál hodi fó ameasa ba ema nia vida no fó impaktu ba atividade ekonómika no atendimentu públiku.
“Ne’e mak kotu ami book-an la di’ak, tanba laiha dalan alternativa. Sorin-sorin mota hotu ne’e atu liu iha ne’ebé? Pasiénsia sasán ofer ba malu deit ona, ema moras ruma karik ambulánsia para iha sorin”, dehan.
Motorista Manuel Perreira husu ba Governu atu hadi’a ponte no estrada sira ne’ebé hetan estragu iha área referida. “Ponte barak maka hetan estragu no estrada balun besik atu monu. Bainhira udan, ami obriga atu liu, maibé mota boot sira, liuliu iha Galusapulu ho parte Ilibole nia perigozu tebes”, nia hateten.
Rezidente sira hein katak governu sei foti pasu konkretu sira hodi garante transporte seguru iha Galusapulu no permite sira atu halo fali atividade normál sira.
Daudaun ne’e, movimentu tranporte públiku no privadu diresaun Maliana bá Bobonaru no Loloto’e kontinua la’o normál, maibé atu ultrapasa tenke fó tempu ba malu tanba espasu kloot.
Notísia relevante: IGEADI hahú normaliza estrada husi Oe-leu bá Kolimau
Jornalista: Sergio da Cruz
Editora: Maria Auxiliadora
