DILI, 29 Dezembru 2025 (TATOLI)—Ministériu Edukasaun (ME) hamutuk ho Komisaun Funsaun Públika (KFP), Segunda ne’e, realiza serimónia pose ba profesór Ensinu Sekundáriu Jerál no Ensinu Tékniku Vokasionál (ESJ-ESTV) hamutuk na’in-588 hodi koloka bá eskola sira iha territóriu nasionál.
Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domigos Lopes Lemos, hateten natureza prinsipál husi profesór sira mak tenke iha responsabilidade atu dezenvolve pensamentu krítiku foinsa’e sira-nian.
“Ita-boot sira sei prepara kandidatu universitáriu sira, líder sira, no pensadór sira iha futuru ne’ebé sei orienta ita-nia demokrasia iha dékada sira tuir mai,” Sekretáriu Estadu dehan liuhusi nia deskursu iha Jináziu Dili.
Lopes dehan Timor-Leste presiza tékniku dezenvolve área estratéjika hanesan dijitalizasaun, ekonomia azúl, kafeikultura, agrikultura moderna, mekánika, konstrusaun sivíl, espesialista turizmu no infraestrutura.
Sekretáriu Estadu ne’e afirma labele hanorin de’it matéria, maibé hanorin valór no atitude sira, sai rigorozu, maibé sai umanu no inkluzivu.
“Ita-boot sira maka ponte entre nasaun ne’ebé ita iha ohin loron no nasaun dezenvolvidu ne’ebé ita mehi,” nia tenik.
Iha sorin seluk, Prezidente Komisaun Funsaun Públika, Agostinho Letêncio de Deus hateten ohin hanesan momentu importante ba revitalizasaun rekursu umanu iha administrasaun públika iha setór edukasaun.
“Nomeasaun maka mekanizmu ida-ne’ebé kandidatu idak-idak kompromete no manifesta publikamente sira-nia integrasaun iha karreira dosente nian, iha-ne’ebé sira kompromete atu ezerse sira-nia funsaun no responsabilidade sira, nune’e mós posui direitu sira-ne’ebé inerente ba karreira dosente nian no hala’o sira-nia kna’ar tuir área atividade nian no servisu fatin ne’ebé sei define,” nia subliña.
Nia informa profesór sira-ne’ebé hetan admisaun ba vaga sira sei integra ba kategoria grau C iha kareira dosente nian. Ne’e hanesan mekanizmu ida-ne’ebé implementadu atu kontribui ba objetivu prinsipál atu hasa’e kualidade sistema edukasaun iha Timor-Leste.
Entretantu, profesór 588 ne’e sei koloka ba munisípiu sira hanesan Aileu na’in-26, Ainaru 21, Ataúru 10, Baukau 79, Bobonaru 41, Kovalima 36, Dili 40, Ermera 88, Lautein 47, Likisá 23 , Manatutu 39, Manufahi 35, Vikeke 51 no Oekusi 52.
Jornalista: Osória Marques
Editór: Xisto Freitas da Piedade
