DILI, 29 Dezembru 2025 (TATOLI) – Reabilitasaun terminal departure ka embarke iha Aeroportu Internasionál Prezidente Nicolau Lobato (AIPNL), iha Komoro, Dili, ezekuta husi empreza Divita Group, konklui no hetan ona bensan husi Padre Mariano Maia, iha segunda-feira ne’e.
Prezidente Administrasaun Navegasaun Aérea Timor-Leste (ANATL), Romualdo Silva, informa katak, hahú iha 01 Janeiru 2026, públiku ne’ebé hakarak halo viajen, tantu sai komu tama, bele utiliza terminal departure iha aeroportu Dili.
Nia esplika katak terminál ne’e pakote intergradu ida ho terminal arrival ka xegada nian, maibé daudaun komponente departure nian finaliza uluk, nune’e permite nia entrada iha funsionamentu.
“Instalasaun iha departure nian ne’e diferente uluk ho agora. Ne’e mak hanesan ita hotu haree ba fíziku nian nafatin, maibé iha laran liuliu interiór ami halo mudansa uitoan oinsá fó mensajen di’ak ba vizitante sira, tanba aeroportu nu’udar odamatan ba nasaun. Entaun, kria ambiente ne’ebé di’ak hodi fó atendimentu ba públiku”, Romualdo Silva hateten iha aeroportu Komoro.
Aleinde ne’e, padre mós fó bensan ba automatic parking system ka sistema automátiku estasionamentu, atu fasilita serbisu operasionál ba atendimentu públiku, liuliu ba karreta no motór sira ne’ebé tanba tama no sai iha aeroportu.
“Parking system ne’e iha tinan rua ba kotuk ita lansa tiha ona ida, maibé iha fasilidade demanda komesa aumenta entaun ohin loke tan rua nune’e bele akumula karreta no motór ne’ebé tama-sai iha aeroportu”, nia dehan.
Aleinde ne’e fó mós bensan ba karga mortuária, tanba durante ne’e tinan hira nia laran maluk balun mate iha rai-li’ur lori mai fatin laiha, entaun sempre liuhusi fatin ne’ebé la adekuadu. Nune’e, ANATL hola inisiativa hodi halo uma ida-ne’e, atu mate-isin ruma mai karik bele atende ho dignu.
Kona-ba orsamentu, Romualdo Silva adianta katak fundu ba parkirng system nian no karga mortuária nian mai husi ANATL, ne’ebé rihun $12 ba estasionamentu no rihun 20 ba karga mortuária. Ba funsionamentu terminal departure, integradu pakote ho arrival, ne’ebé nian orsamentu mai husi Fundu Infraestrutura, ho kustu totál millaun $1-resin.
Iha fatin hanesan, Prezidente Empreza Divita Group, Fernando da Silva, hateten projetu kona-ba reabilitasaun aeroportu Komoro ne’e sira-nia parte foku mak ba terminal departure no arrival nian.
Kona-ba progresu terminal arrival nian daudaun la’o hela, tanba loron uza hela ba operasionál no kalan mak halo serbisu. “Ita halo reabilitasaun ne’e instalasaun balun ita tau foun no balun mantein, tanba ita la’ós halo konstrusaun foun”, konklui.
Notísia relevante: Xanana klarifika dezeñu aeroportu internasionál Prezidente Nicolau Lobato
Jornalista: Arminda Fonseca
Editora: Maria Auxiliadora
