DILI, 29 Dezembru 2025 (TATOLI)—Tribunál Judisiál Primeira Instánsia Dili (TJPID), Segunda ne’e, liuhusi desizaun akordaun ne’ebé lee sai husi Juiza Ana Paula Fonseca, deklara hodi absolve membru F-FDTL na’in-tolu JXB, MdC no DNS, husi krime sukuestru no abuzu podér, ne’ebé Ministériu Públiku (MP) imputa ba arguidu sira.
Juíz prosesu haree katak bazeia ba depoimentu husi arguidu no sasin sira, konklui katak laiha faktu sufisiente atu kondena arguidu na’in-tolu. Tanba ne’e, Tribunál Kolektivu konsidera la provadu ba faktu ne’ebé MP konsta iha akuzasaun no ikus mai deside absolve arguidu sira.
Desizaun Tribunál fundamenta katak arguidu na’in-tolu livre husi kustu judisiáriu tanba hetan asisténsia legál husi Defensór Públiku.
Tribunál Koletivu mós esplika katak, bainhira parte ne’ebé la konkorda ho desizaun bele halo rekursu ba Tribunál Rekursu, tuir prazu loron 30 nia-laran.
Akuzaun
Tuir faktu sufisiente katak, iha loron 28 Janeiru 2022, tuku 8:30 kalan, arguidu JXB, kontaktu ba lezadu AS liuhusi telemóvel no konvida lezadu atu bá hemu kafé iha jardín Motael Dili, ho intensaun atu ko’alia kona-ba projetu eletrisidade.
Hafoin kontaktu lezadu ho nia kolega DP bá iha fatin ne’ebé determina no bainhira to’o iha fatin referidu, parte lezadu hasoru malu ho arguidu no sira hodi ko’alia ba malu.
Notísia relevante : MP husu Tribunál kondena arguidu na’in-tolu ne’ebé envolve kazu sekuestru no abuzu poder
Lezadu haree arguidu haruka mensajen, maibé lahatene arguidu haruka mensajen ba sé. Hafoin lezadu ko’alia hela ho arguidu JXB, ema ne’ebé arguidu haruka mensajen bá ne’e lakleur de’it sira mós mai.
Sira ne’e maka hanesan arguidu JXB, hamutuk ho arguidu MdC no DNS inklui ema sira ne’ebé nia la koñese no diretamente halo agresaun ba lezadu, tuku iha ibun, hirus matan no kuaze isin tomak.
Hafoin halo ataka fíziku ba lezadu, sira kontinua lori lezadu ba Kuarté Jerál PNTL iha Kaikoli Dili. Bainhira to’o iha sala investigasaun, arguidu DNS obriga lezadu asina dokumentu ne’ebé sira prepara ona, maibé lezadu lakohi asina.
Nune’e, arguidu DNS tuku iha lezadu nia hasan sorin loos no kontinua tuku lezadu iha kakorok to’o monu bá rai, halo moras no kanek.
Sira obriga lezadu atu asina dokumentu ne’e, maibé lezadu lakohi no arguidu DNS kaer lezadu nia liman no asina dokumentu.
Arguidu sira laiha autoridade atu detein ema seluk, maibé arguidu sira JXB, MdC no DNS uza sira-nia autoridade nu’udar membru F-FDTL hodi halo asaltu fíziku ba parte ne’ebé hetan kanek hodi obriga sira tenke asina dokumentu ne’ebé sira prepara ona.
Hafoin ne’e, arguidu sira tula lezadu ho karreta ne’ebé laiha númeru xapa matríkula ba Kuartél Jerál PNTL, ne’ebé sira asalta ho fiu eletrisidade metan iha nia isin lolon tomak.
Arguidu sira bainhira hala’o aktu sira ne’ebé deskreve, sira hatene katak lei bandu, sira atua ho livre, deliberada no konxiente, no la hadook-an hosi hahalok hanesan ne’e. Sira hakarak atu estraga parte ne’ebé hetan kanek iha nia integridade fíziku hodi hamosu moras no kanek sira ne’ebé akontese duni.
Arguidu sira tau lezadu iha sala investigasaun iha, la konsege sai husi fatin asalta nia ba objetivu ida-ne’e, nune’e hasai nia liberdade, ne’ebé sira hotu hakarak halo ho livre no ho konxiénsia.
Maizumenus iha tuku 22.00, arguidu sira tula fali lezadu ne’ebé ho kondisaun grave ona, iha karreta ida no husik hela iha área Palapasu, Dili.
Arguidu sira hatene didi’ak katak sira-nia hahalok bandu no punível husi lei nu’udar krime, no nune’e viola devér sira ne’ebé iha sira nia estatutu nu’udar membru F-FDTL no funsionáriu públiku sira, liuliu dever imparsialidade, laran manas, lealdade no integridade hodi tau iha risku interrese Estadu no legalidade asaun husi ninia orgaun hotu-hotu no ninia ajente sira-nia onestidade nu’udar indispensável ba kondisaun sira ezersísiu ba sira-nia funsaun públika.
Tanba ne’e, MP akuza arguidu na’in-tolu komete krime sukuestru no abuzu podér neebe previstu iha artigu 160 no artigu 297.
Audiénsia julgamentu ne’e prezide husi Juíz Kolektivu, Ana Paula, Ercília de Jesus, José Maria, MP reprezenta husi Prokuradór Adérito Tilman, arguidu sira hetan asisténsia legál husi Defensór Públiku, Sérgio Dias Quintas.
Jornalista : Natalino Costa
Editora : Julia Chatarina
